Қордайдағы қақтығыс: Таразда сот отырысы басталды

ERNUR.KZ. Бүгін Тараздағы тергеу изоляторында Жамбыл облысында болған қақтығысқа қатысты сот отырысы басталды, деп жазады Tengrinews.kz.

Сот Тараз изоляторында Айдарбек Замбаевтың төрағалымен өтіп жатыр. Ол үшін арнайы бөлме дайындалған. Сондай-ақ, залда 60-қа жуық адвокат бар. Процестің барлық қатысушысы коронавирусты анықтайтын тест тапсырды.

Сот алдында 51 адам жауап береді. Олардың 33-і қамауда, 16-сына кепіл түріндегі бұлтартпау шарасы таңдалған, ал екеуі ешқайда кетпеу туралы қолхатта. 366 адам осы іс бойынша жәбірленуші болып танылды.

Еске салайық, биыл 8 ақпанда Жамбыл облысы Қордай ауданы аумағында жергілікті ауқымдағы техногендік сипаттағы төтенше жағдай жарияланған болатын.

Екі мыңнан аса адам қатысқан жаппай тәртіпсіздік барысында 11 адам қаза тапқан болатын. 168 тұрғын үй мен сауда нысандары, сондай-ақ 100-ден аса көлік қиратылған еді.