Түркия мен Сириядағы жер сілкінісінен қаза тапқандар саны 46 мыңға жеткен

ERNUR.KZ. Түркияның ішкі істер министрі Сүлейман Сойлу елдің оңтүстік-шығысындағы жер сілкінісінен қаза тапқандар саны 46 мыңға жақындағанын айтты, деп жазады tengrinews.kz.

"Құрбан болғандар саны 45 968-ге дейін жетті. Оның 4267-сі - Сирия азаматтары", - деді түрік министрі.

Ол алғашқы жер сілкінісінен бері 13 мыңнан аса қайталама дүмпу болғанын айтты.

Министрдің сөзінше, 26 300 ғимарат опырылған, бұл ғимараттардың барлығында дерлік іздеу-құтқару жұмыстары жүргізілген.

Айта кетейік, 6 ақпанда Түркияның оңтүстік-шығысында 7,7 және 7,6 балдық жер сілкінісі болды. 45 мыңнан аса адам осы апаттың құрбаны болды.