Түркияда тағы жер сілкініп, бір адам қаза тапты

ERNUR.KZ. Дүйсенбі, яғни 27 ақпанда Түркияның Малатья провинциясында 5,6 балдық жер сілкінісі болып, 32 адам құтқарылды, деп жазады azattyq-ruhy.kz.

Түркия үкіметі жанындағы Төтенше жағдайлардың алдын алу және зардаптарын жою департаментінің (AFAD) басшысы Юнус Сезер мәліметінше, зілзала салдарынан 29 тұрғын үй құлап, бір адам қаза тапты, сондай-ақ 110 адам зардап шекті.

Қазіргі кезде екі үйдің қирандыларының астынан құтқару жұмыстары жүргізіліп жатыр. Іздестіру-құтқару жұмыстарына 657 адам жұмылдырылған.

Сезер азаматтарға зақымдалған үйлерден алыс болу керек екенін ескертті.

«Апат аймағында тұратын барлық азаматтың ұялы телефонына тиісті SMS-хабарлама жіберілді. Жерасты дүмпулері әлі де тіркеліп жатыр, зақымдалған үйлер құлауы мүмкін», - деп ескертті ол.