2025 жылы Қазақстандағы айыппұлдар көбейді

Жаңа жылда Қазақстандағы айыппұлдардың мөлшері де жаңарды. Бұл өзгерістер айлық есептік көрсеткіштің (АЕК) өсуіне және әкімшілік құқық бұзушылық туралы кодекске енгізілген түзетулерге тікелей байланысты. Осы ретте қазақстандықтар 2025 жылы жолдағы теріс қылықтар үшін қандай айыппұл төлейтінін назарларыңызға ұсынамыз.

Сөз басында 2025 жылы АЕК 3 932 теңгені құрап, өткен жылғы көрсеткіштен 6,5 пайызға немесе 240 теңгеге артық болып бекітілгенін атап өту керек.

Жүргізушілерге арналған айыппұлдар

● Көлікте белдік тақпау және рульде ұялы телефонды пайдалану үшін – 5 АЕК немесе 19 660 теңге. (ӘҚБтК-нің 593, 591-баптары)

● Бағдаршамның қызыл түсіне қарамастан өту үшін - 10 АЕК немесе 39 320 теңге. (ӘҚБтК-нің 599-бабы)

● Тротуарда, гүлзарларда, көгалдарда, балалар немесе спорт алаңдарында аялдау немесе тұрақтау үшін — 10 АЕК немесе 39 320 теңге. (ӘҚБтК-нің 597-бабы)

● Жол қозғалысының басқа қатысушыларына жол бермеген жүргізушілер үшін - 10 АЕК немесе 39 320 теңге. (ӘҚБтК-нің 600-бабы)

● Жол белгілерімен белгіленген талаптарды сақтамағаны үшін - 3 АЕК немесе 11 796 теңге. (ӘҚБтК-нің 601-бабы)

● Көліктің тиісті санатын басқару құқығынсыз автокөлікті басқару үшін - 20 АЕК немесе 78 640 теңге.(ӘҚБтК 612-бабының 2-бөлігі)

● Көлік басқару құқығынан айырылғанына қарамастан рульге отырған жүргізушілер үшін - 50 АЕК немесе 196 600 теңге. (ӘҚБтК 612-бабының 3-бөлігі)

● Жылдамдықты сағатына 10-20 километрге арттырғаны үшін — 5 АЕК немесе 19 660 теңге. (ӘҚБтК-нің 592-бабы 1-бөлігі)

● Жылдамдықты сағатына 20-40 километрге арттырғаны үшін — 10 АЕК немесе 39 320 теңге. (ӘҚБтК-нің 592-бабының 2-бөлігі)

● Жылдамдықты сағатына 40-60 километрге арттырғаны үшін — 20 АЕК немесе 78 640 теңге. (ӘҚБтК-нің 592-бабының 3-бөлігі)

● Жылдамдықты сағатына 60 километрден асырғаны үшін — 40 АЕК немесе 157 280 теңге. (ӘҚБтК-нің 592-бабының 3-1-бөлігі 2024 жылғы 4 желтоқсанда күшіне енді)

● Бір жыл ішінде жылдамдықты қайта арттырғаны үшін - 30 АЕК немесе 117 960 теңге. (ӘҚБтК-нің 592-бабының 4-бөлігі)

● Бір жыл ішінде жылдамдықты сағатына 60 километрден қайталап арттырғаны үшін - 60 АЕК немесе 235 920 теңге. (ӘҚБтК-нің 592-бабының 5-бөлігі 2024 жылғы 4 желтоқсанда күшіне енді)

Жаяу жүргіншілерге арналған айыппұлдар

● Жолдың кесіп өтуге болмайтын жерінен немесе бағдаршамның қызыл түсіне қарастан өткендер үшін - 2 АЕК, бұл 7 864 теңгені құрайды. (ӘҚБтК-нің 615-бабы)

● Бір жыл ішінде жоғарыдағы ережені қайта бұзғандар үшін -10 АЕК немесе 39 320 теңге. (ӘҚБтК-нің 615-бабы)

Басқа да маңызды айыппұлдар

● Қоғамдық орында балағат сөздер айтқаны үшін - 20 АЕК немесе 78 640 теңге. (ӘҚБтК-нің 434-бабының 1-тармағы)

● Тасталған темекі тұқылы немесе қоқыс, сондай-ақ тыйым салынған жерге түкіру үшін -10 АЕК немесе 39 320 теңге. ( 434-2-бап 2024 жылғы 5 шілдеден бастап қатаңдатылды)

● Жұмыс күндері таңғы 9.00-ден 22.00-ге дейін, демалыс және мереке күндері таңғы 10.00-ден 23.00-ге дейін тыныштықты бұзғаны үшін - 5 АЕК немесе 19 660 теңге. (ӘҚБтК-нің 437-бабы)

● Алкогольді ішімдік ішіп, қоғамдық орындарда мас күйде жүргені үшін - 5 АЕК немесе 19 660 теңге. (ӘҚБтК-нің 440-бабы)

● Қоғамдық орындарда темекі, оның ішінде кальян немесе вейп шегу үшін -15 АЕК немесе 58 980 теңге. (ӘҚБтК-нің 441-бабы)

● Қоғамдық көлікте ақы төлемей жол жүргені үшін - 2 АЕК немесе 7 864 теңге. (ӘҚБтК-нің 622-бабының 2-бөлігі)

● Ғимараттар мен жалпы қоғамдық орындарға зиян келтіргені үшін - 50 АЕК немесе 196 600 теңге (ӘҚБтК-нің 434-бабының 4-тармағы 2024 жылғы 5 шілдеден бастап қатаңдатылған)

● Ретсіз сауда, сәуегейлік, қайыр сұрау, жезөкшелікпен айналысу мақсатында қоғамдық тәртіпті бұзғандар үшін - 5 АЕК немесе 19 660 теңге. (ӘҚБтК-нің 449-бабы)

● Кәмелетке толмағандарға темекі өнімдерін немесе алкогольді өнімдерді сатқаны үшін кәсіпкерлік субъектісіне байланысты - 15-тен 100 АЕК-ге дейін, яғни 58 980 теңгеден 393 200 теңгеге дейін. (ӘҚБтК-нің 133-бабы)

● Кәмелетке толмаған балалары сағат 22.00-ден кейін ойын-сауық орындарында қараусыз жүрген ата-аналар үшін - 3 АЕК немесе 11 796 теңге. (ӘҚБтК-нің 132-бабы)

Дайындаған: Б.Мейірханұлы,

ERNUR.KZ

Тағы оқыңыз:

Қар жауып тұрған кезде көлікті ҚАЛАЙ БАСҚАРУ КЕРЕК?

Әйелдерге қарағанда ЕРЛЕР жол апатына ЖИІ ТҮСЕДІ