ТҮРКІСТАН: Ы.Алтынсарин кітапханасында «Болашаққа – кітаппен» мерекелік іс-шарасы өтті

Түркістанда Халықаралық балалар кітабы күніне орай «Болашаққа – кітаппен» атты мерекелік іс-шара өтті, деп хабарлайды ERNUR.KZ.

Кітапхана – оқырман мен кітап арасындағы алтын көпір десек қателеспейміз. Қазіргі қоғамда да оқырманның талабын қанағаттандыру және рухани азықпен қамтамасыз ету міндеттерін іске асыруда кітапханалардың алатын орны ерекше. Осындай жауапкершілігі жоғары міндетті 64 жыл бойы атқарып келе жатқан Түркістан облыстық Ы.Алтынсарин атындағы балалар кітапханасы соңғы бірнеше жылда күрделі жағдайға тап болып, жабылуға да шақ қалған. Дегенмен мемлекет мүддесін ойлайтын азаматтардың ықпалымен бұл құтхана Шымкент қаласынан Түркістанға көшіріліп, біршама уақыт облыстық «Фараб» кітапханасында қызмет атқарды. Енді облыс әкімдігі қаладағы жаңа ғимараттардың бірін жалға алып, балалар кітапханасының еншісін беріп отыр. Ұжым 2 сәуір – Халықаралық балалар кітабы күніне орай «Болашаққа – кітаппен» атты мерекелік іс-шара өткізді. Осылайша Ыбырай Алтынсарин атындағы мекеменің Түркістандағы жаңа дәуірі басталды.

Іс-шара қонақтары алдымен балалар әдебиетінің ұлы өкілі Андерсеннің туғанына 220 жыл толуына орай жасақталған және қазақ балалар әдебиеті жазушыларының кітаптары қойылған көрмені тамашалады. Ұлы ғалым, ағартушы Ыбырай Алтынсаринның еңбектеріне негізделген «Алтынсарин әлемі» кітап көрмесі де назарға ұсынылды.

Іс-шараны Қазақстан Журналистер одағының мүшесі, ҚР Құрметті журналисі Роза Нарымбетова, ҚР Еңбек сіңірген қызметкері, Ы.Алтынсарин төсбелгісінің иегері Несіпкүл Өтебаева, ақын, ҚР Жазушылар одағының Түркістан облысындағы өкілі Айдар Сейдазым және Түркістан облыстық «Фараб» әмбебап ғылыми кітапханасының директоры Жанат Шардарбекова ашып беріп, балалар кітапханасының алдағы жұмыстарына сәттілік тіледі. Сонымен қатар, өңір ақыны Сайлаухан Жоланов пен журналист Қайрат Кәрібаев балалар әдебиеті саласындағы өзекті мәселелерді сөз етіп, жылы лебіздерін білдірді.

Мерекелік іс-шара барысында бүлдіршіндер ұлы қаламгерлердің өлеңдерін оқып, күй тартып, би билеп, әуезді әндер шырқады. Іс-шара соңында кітапхана директоры Рысбек Летаев қонақтарға алғыс білдіріп, өнер көрсеткен оқушыларды алғыс хатпен марапаттады. Одан бөлек, алдағы уақытта облыс әкімдігі кітапханаға жеке ғимарат алып беретінін айтып, сүйінші хабармен бөлісті.

Айта кетейік, облыстық балалар кітапханасының іргетасы 1961 жылы қаланған. Кітапхана өз қызметін 1961 жылы 340 дана кітап қорымен бастаған. Әдепкіде 4 қызметкер бір ғана шағын бөлмеде жұмыс істеген. 1976 жылы облыстық балалар кітапханасына Шымкенттегі В.И.Ленин (қазіргі әл-Фараби) көшесінің бойынан 9 қабатты үйдің 1-қабатынан орын беріліп, сол жылы 23 наурызда қазақтың ұлы ғалымы, педагог-ағартушысы Ыбырай Алтынсариннің есімімен аталған. Балалар кітапханасы Шымкент қаласынан Түркістан шаһарына 2024 жылдың қазанында көшіп келіп, облыстық «Фараб» әмбебап ғылыми кітапханасының ғимаратына орналасты. Қазіргі таңда мұндағы кітап қоры – 236 403 дана. Қорда балаларға арналған әлемдік әдебиеттер, заманауи көркем әдебиет (отандық және шетелдік), оқу процесіне көмектесетін салалық және анықтамалық әдебиеттер, мерзімді басылымдар, аудио және бейне материалдар, электронды басылымдар бар. Одан бөлек, кітапхананың сирек қорында 250-ден аса кітап, пластинкалар мен диафильмдер сақталған. Бүгінде кітапхана білім беретін, бос уақытты тиімді пайдаланатын, ақпараттық және коммуникативтік орталық болып саналады.

Кітапханада бір-бірімен тығыз байланыста жұмыс істейтін 8 бөлім мен 1 сектор бар. Ұжым мектеп жасына дейінгі бүлдіршіндерге, 1-9 сынып оқушылары мен балалар жетекшілеріне қызмет көрсетеді. Қазіргі уақытта Түркістан облысында 20 балалар кітапханасы қызмет көрсетеді. Ал, Ы.Алтынсарин атындағы балалар кітапханасы сол мекемелерді кітап және ақпаратпен қамтамасыз ететін әдістемелік орталық болып саналады.

Кітапхана директоры Рысбек Летаев көптеген жобаны іске асыру жоспарланғанын айтты. Атап айтқанда, «Бір ел-бір кітап» республикалық акциясы аясында Ж.Нәжімеденов пен Т.Әлімқұловтың және «Түркістанның таңдаулы туындысы» жобасы шеңберінде Бақытжан Алдияр, Бекжан Әшірбай, Әлібек Шегебай мен Мұқағали Кенжетайұлының шығармаларын насихаттап, мейрейтой иелері мен маңызды мерекелерге арналған іс-шаралар өткізбек. Одан бөлек, «Әлемді кітап арқылы танмимын» облыстық байқауы, «2025 жыл – Балалар кітапханасы жылы» жобасы, кітапханалық «Әжемнің өсиеті», «Бала терапиясы», «Кітаппен өткен күн қызық» оқырман клубы, «Саяхатшы қуыршақтар» және де түрлі жобалар бойынша оқырманға қызмет көрсетеді.