Ақтауда пәтерінде жарылыс болған әскери қызметкерге қатысты іс қозғалды

ERNUR.KZ. Ақтауда пәтерінде жарылыс болған әскери қызметкерге қатысты сотқа дейінгі тергеу жүріп жатыр, деп жазады azattyq-ruhy.kz.

Lada.kz жазуынша, қазіргі кезде сотқа дейінгі тергеп-тексеру ҚР Қылмыстық кодексінің 462-бабының 1-бөлігі (Айналадағы адамдарға қауіп төндіретін қарумен, қауіпті заттармен және бұйымдармен жұмыс істеу қағидаларын бұзу) бойынша жүргізілуде. Бұл туралы Ақтау гарнизонының әскери прокуратурасынан хабарлаған.

Ведомствода 3 желтоқсанда 27-шағынаудандағы №46 тұрғын үйде болған жарылыс фактісі бойынша Ақтау облыстық гарнизонының әскери полициясы Қылмыстық кодекстің 462-бабының 1-бөлігі бойынша сотқа дейінгі тергеу жүргізіп жатқанын хабарлады.

«Қылмыстық іс бойынша тиісті сараптамалар тағайындалды, тергеу шаралары жүргізілуде, оның қорытындысы бойынша процессуалдық шешім қабылданады. Қазақстан Республикасы Қылмыстық-процестік кодексінің 201-бабына сәйкес тергеу мүддесі үшін басқа мәліметтер таратуға жатпайды», - деп атап өтті Ақтау гарнизоны әскери прокуратурасы.

Еске сала кетейік, қаладағы 27-шағынаудандағы No46 үйде жарылыс болып, оқиға орнына бірнеше патрульдік көлік пен өрт сөндірушілер келді. Дәрігерлер жарылыс салдарынан ауыр жарақат алған әскери қызметкердің қолын кесуге мәжбүр болды.