"Алатау жастары" тұрғын үй бағдарламасы басталады

"Алатау жастары" бағдарламасының негізгі шартына сәйкес, өтінім беруші Алматы облысының тұрғыны болу керек. Ал осы өңірде ресми жұмыс өтілі бір жылдан кем емес. Оны міндетті түрде зейнетақы жарналары көрсетілген құжатпен растау қажет.

Бұдан бөлек, бағдарламаға қатысушының және оның отбасы мүшелерінің атында соңғы 5 жылда жылжымайтын мүліктің болмауы тиіс. Бірінші кезеңде облыс әкімдігі жаңа жобаға 600 млн теңге бөліп отыр. Ал Отбасы банк өз кезегінде бұл қаражатқа жеңілдетілген несие беруге көмектеседі.

"Жаңа тұрғын үй бағдарламасына қатысу туралы өтініштер 2022 жылдың 1 қарашасынан бастап, бір ай бойы қабылданады. Үміткерлер облыс әкімдігінің ішкі саясат басқармасына өтініш берулері қажет", - делінген ресми хабарламада.

Өтініштерді қабылдау аяқталғаннан кейін әкімдіктен арнайы құрылған комиссия жиналған ұпайлар бойынша бағдарламаға қатысушыларды іріктейді. Сол кезде некеде болған жылдар саны, балаларының болуы, жұмыс тәжірибесі, мамандығы және қызмет саласы есепке алынады.

Сосын қатысушылардың тізімі жасалып, Отбасы банкіне жіберіледі. Банк қызметкерлері бағдарламадан өткен адамдарға өздері хабарласы, төлем қабілеттілігін растауға шақырады. Одан кейін баспананы табу қажет. Ипотеканың шекті сомасы - 10 млн теңге.

Егер мүліктің құны 10 млн теңгеден асып кетсе, үміткер айырмашылықты өз қаражаты есебінен төлей алады. Бағдарлама аясында жаңа тұрғын үй рәсімделсе, алғашқы жарна 0% болады.

Ал екінші нарықтан алынған тұрғын үйді кредитке алу үшін 10% алғашқы жарна құю қажет. Ипотеканың сыйақы мөлшерлемесі - жылдық 5%-ға тең (ЖТСМ 5,2%). Мерзімі – 19 жыл.