Биылғы жазда астаналықтар үшін демалыс орнына айналған әйгілі қызғылт түсті тұзды көлге баруға тыйым салынды.
ERNUR.KZ. Ақмола облысының Ерейментау ауданының әкімдігі Көбейтұз, Теңіз, Құрбет және Қоржынкөл көліне адамдардың келуіне тыйым салу туралы шешім қабылдады, деп жазады sputniknews.kz.
Жаз басталысымен елорда тұрғындары 200 шақырым қашықта орналасқанына қарамай, осы көлге қарай жаппай ағылатын. Шет ел тұрмақ, Қазақстанның өзге өңірлеріндегі курорттарға бара алмауына байланысты, бұл көлдер астаналықтардың сүйікті демалыс орнына айналды. Адамдар ерекше көріністі тамашалап, фотосессия жасау үшін де осында келетін.
Ерейментау ауданының әкімі мен мобильді бақылау тобы Көбейтұз бен Теңіз көліне арнайы рейд жүргізді. Яғни, аудан тұрғындары арасында COVID-19 жағдайының көбеюіне байланысты және Ақмола облысының бас мемлекеттік санитарлық дәрігерінің 2020 жылғы 4 шілдедегі №86 "Коронавирус инфекциясы (COVID-19) ауруларының таралуына жол бермеу үшін қатаң шектеу шараларын енгізу туралы" Ақмола облысының бас мемлекеттік санитар дәрігерінің бұйрығы іске асырылуда.
"Ақмола облысы мен Ерейментау аймағындағы эпидемиологиялық жағдай тұрақталғанға дейін: Көбейтұз, Теңіз, Құрбет, Қоржынкөл көліне және Ерейментау ауданының аумағында орналасқан барлық көлдерге баруға тыйым салынады", – делінген аудан әкімінің өкімінде.
![](/assets/thumbnails/9e/9ef24a1ed3ef35d6eb3d88d8acc718f7.jpeg ""Күйеуіммен полицияға ұсталып, қамалып отырғанда танысқанмын"")
