Атырауда сотқа тіл тигізген блогер қамауға алынды

25.01.2024 10:09

605

Блогер басқа адамға қатысты сот отырысына қолдау көрсетуге келіп, сол жерде сотқа "Маймыл қайда, көрмедіңіздер ме?" деген сұрақ қойған.

ERNUR.KZ. Атырауда сотқа құрметсіздік танытты деген айыппен Рүстем Баязиевке әкімшілік хаттама толтырылды. Ол бес тәулікке қамауға алынды, деп жазады stan.kz.

Атырау қаласы әкімшілік құқықбұзушылық бойынша маманданған сотының судьясы Анар Айтжанова бұл сұрақты қорлау деп қабылдап, "сотқа құрметсіздік танытқаны үшін" Баязиевке репорт жазған. Осыған байланысты 12 қаңтарда сот приставы Әкімшілік құқықбұзушылық туралы кодекстің 653-бабы 1-бөлігі ("Сотқа құрметсіздік танытқаны үшін") бойынша Баязиевке әкімшілік хаттама толтырды.

Кеше Атырау қаласының әкімшілік құқықбұзушылық жөніндегі мамандандырылған сотында блогерге қатысты іс қаралды.

"Сот қаулысымен блогер Әкімшілік құқықбұзушылық туралы кодекстің 653-бабы 1-бөлігі бойынша айыпты деп танылды, оны жеке басын, жасаған әкімшілік құқық бұзушылық сипатын ескере отырып, бес тәулік мерзімге әкімшілік қамауға алу туралы шешім шықты", делінген сот хабарламасында.

Блогер мұндай шешіммен келіспеді. Оның айтуынша, ол жай ғана судьяға сұрақ қойған және бұл оқиға сот басталғанға дейін болған. Баязиев сот шешіміне шағымдануға ниетті.