Атырауда Жайық өзеніне батып кеткен көлікте екі адам болған

Атырау облыстық полиция департаментінің баспасөз қызметінен мәлім еткендей, 17 қазанда учаскелік полиция инспекторы Жайық өзеніне бағыт алған автокөлік ізі барын хабарлаған.

«Атырау облыстық төтенше жағдайлар департаментінің қызметкерлері Жайық өзеніне батып кеткен Niva автокөлігін шығарды. Көліктің салонында екі ер адамның болғаны анықталды. Олар мерт болған. Оның бірі 1971, екіншісі 1981 жылы туған. Марқұмдарда дене жарақаты анықталған жоқ, - деп хабарлады департаменттің баспасөз қызметі.

Полиция қызметкерлері бейнекамералардың жазбасына тексеру жүргізген. Бейнекамераға 16 қазанда түнгі сағат 23:18 шамасында аталған көліктің жоғары жылдамдықпен Жайық өзеніне батқаны туралы видео түскені анықталған.

Қазір полиция қызметкерлері аталған оқиғаға байланысты тексеру жүргізіп жатыр. Мүрделерге сот медициналық сараптамасы тағайындалды.

Еске сала кетелік, бұдан бұрын Атырауда 32 жастағы жүргізуші 3 адамды қағып кеткенін хабарлаған болатынбыз.

Полицияның мәліметінше, оқиға күндіз болған. Атырау қаласындағы Азаттық даңғылының бойында 1991 жылғы жүргізуші Opel Astra автокөлігімен 3 жаяу жүргіншіні қағып кетті. Зардап шеккен 1967 және 1980 жылғы екі ер адам мен 1998 жылғы әйел жедел жәрдем көлігімен облыстық ауруханаға жеткізілді. Дәрігерлердің тексеруінен кейін екі ер адам ауруханаға жатқызылды.