Биылғы ҰБТ сұрақтарына жаңа өзгеріс енгізіледі

иллюстрациялық фото

11-сыныптың IV тоқсанындағы сабақтар бойынша сұрақтар ҰБТ-ға кірмейді, деп хабарлайды ERNUR.KZ Еуразия бірінші арнасына сілтеме жасап.

"Евразия" бірінші арнасы редакциясына Батыс Қазақстан облысы Ақсай қаласының тұрғындары байланысқа шыққан. Олар қашықтықтан оқытудың кесірінен 11-сынып оқушылары ҰБТ-ға дұрыс дайындала алмай, жоғары оқу орынына грантқа оқуға түсе алмай қалады ма деп алаңдайды.

Ұлттық тестілеу орталығы қашықтықтан оқыту дайындыққа кедергі келтірмейді деп сендірді. Тесттерден IV тоқсанындағы бағдарламада қамтылған барлық тапсырмалар алынып тасталады.

"Оқушыларға IV тоқсанында оқылған сабақ тапсырмалары бойынша сұрақтар келмейтін болады. Яғни, 5-ші сыныптан 11-сыныпқа дейін үш тоқсанның оқу бағдарламалары тест сұрақтарында қамтылады. ҰБТ өткізу бұрынғы форматта қала береді, алайда біз қосымша санитарлық шектеулер енгіземіз. Яғни, біз тест алушылардың арасындағы қашықтықты арттырамыз, баланың дене қызуын тексеру үшін қосымша бақылау енгіземіз, яғни тиісті жабдықтар болады", - деді Ұлттық тестілеу орталығының директоры Дидар Смағұлов.