Қасым-Жомарт Тоқаев бұл тәсіл қауіпсіздік жағынан дұрыс болмағанымен, өте жылдам деп есептейді
ERNUR.KZ. Қазақстан президенті Қасым-Жомарт Тоқаев кейбір тапсырмаларды WhatsApp арқылы беретінін айтты, деп жазады sputniknews.kz.
Мемлекет басшысы студенттік шақта танысқан адамдармен араласасыз ба деген сауалға да жауап берді.
"Қазір олармен үнемі байланыста бола алмаймын. Ресейге келгенде кездесуге тырысамын. Бірақ қазір интернет бар, әлеуметтік желілерді де қолданамын. Тіпті кейбір тапсырмаларды WhatsApp арқылы беремін", - деді Тоқаев "Россия" телеарнасына берген сұқбатында.
Оның айтуынша, бұл қауіпсіздік жағынан дұрыс болмаса да, жұмыс өте жылдам істелінеді.
Сондай-ақ, ол Twitter-ді белсенді қолданатынын айтты. БҰҰ-да істеген кезде осы желіге үйренген.
"Ол ұйымда бәріміздің жеке парақшамыз болуы керек еді. Әрине, менде сол әдет қалды. Twitter–ді жеке телеграф агенттігі деуге болады", - деді ол.
Президент Instagram-ды да пайдаланатынын айтты.
"Бұл желіні президент болған соң пайдалана бастадым. Маған парақша ашуға кеңес берді" , - деді ол.
