Шағын гранттар конкурсына қатысуға Қазақстан Республикасының бастамашыл топтары мен үкіметтік емес ұйымдары қатыса алады.
ERNUR.KZ. Қазақстанда үйсіз жануарларды қолдауға арналған шағын гранттар байқауы басталды. Бұл туралы «Қазақстан волонтерлер лигасы» қоғамдық қоры мәлім етті, деп жазады ҚазАқпарат.
Жануарларға жауапкершілікпен қарауды қалыптастыруға бағытталған «Birgemiz: Аyala» жобасы аясында волонтерлер үшін шағын гранттар байқауы ашылды.
Конкурстың мақсаты - волонтерлік бастамаларды және жануарларға жауапкершілікпен қарауды қалыптастыру жөніндегі жобаларды дамытуға, волонтерлердің жеке бастамаларын қолдауға бағытталған конкурсты ұйымдастыру және 5 шағын грант (әрбір жобаға 500 мың теңге) бөлу.
Шағын гранттар конкурсына қатысуға Қазақстан Республикасының бастамашыл топтары мен үкіметтік емес ұйымдары қатыса алады. Оған еліміздің барлық өңірлерінің тұрғындары қатыса алады, алайда жоба Нұр-Сұлтан қаласының аумағында жүзеге асырылады.
Байқау ережесін @league_volunteers және @birgemiz Instagram профильдерінің сипаттамасынан табуға болады.
Шағын гранттар беруге арналған конкурс келесі 5 тақырып бойынша жарияланады:
1. Балалар мен жасөспірімдер арасында адамгершілік қарым-қатынасты қалыптастыру бойынша акциялар.
2. Жануарларға қарым-қатынас мәдениетін өзгертуге бағытталған флешмоб.
3. Қоғамдық назар аудару бойынша жануарлардың фотокөрмесі.
4. Тегін ветеринариялық қызмет көрсету.
5. Жануарларға жауапкершілікпен қарауды қалыптастыруға бағытталған әлеуметтік бейнероликтер.
Конкурс 2021 жылдың 29 сәуір және 25 мамыр аралығында өткізіледі. Бір тақырып бойынша бір өтінім берушіден 1 (бірден) артық өтінім беруге жол берілмейді.
Жануарларға жауапкершілікпен қарауды қалыптастыруға бағытталған «Birgemiz: Ayala» жобасы Азаматтық бастамаларды қолдау орталығы мемлекеттік гранты шеңберінде іске асырылады.
