Үшінші сынып оқушыларына азғындық жасады деген күдікті ұсталып, қамауға алынды.
иллюстрациялық фото
Жамбыл облысында Шу ауданының 30 жастағы тұрғыны тоғыз жастағы екі жеткіншекті ұзақ уақыттан бері зорлап келген, деп хабарлайды ERNUR.KZ КТК арнасына сілтеме жасап.
"Полиция қызметкерлері жедел іздестіру шараларын жүргізіп, Шу ауданының 30 жастағы тұрғынын ұстады. Аталған дерек бойынша Қазақстан Қылмыстық кодексінің 12-бабы 4-бөлігіне сәйкес сотқа дейінгі тергеп-тексеру басталды. Шу ауданы сотының шешімімен күдіктіге қатысты қамауға алу бұлтартпау шарасы қолданылды. Барлық сараптама тағайындалды", - деді Жамбыл облысы ПД баспасөз хатшысы Гүлсара Мұхтарқұлова.
Таратылған мәліметтерге сүйенсек, 43 жастағы жергілікті тұрғын баласы мен оның досының жыныстық сипатта зорлыққа ұшырағанын айтып полицияға шағым түсірген. Арызда екі балаға ауылдағы қараусыз тұрған ғимараттардың бірінде қиянат жасалғаны айтылған.
Ал бейресми ақпараттарға сенсек, сорақылық оқушының бірінің денсаулығы күрт нашарлап дәрігерге қаралғанда анықталған. Тоқ ішегіне қатты зақым келген. Оқушы азғынның құрбанына айналғанын айтуға қорыққан. Педофил болған жағдайды біреу-міреу естісе, "өздеріңді де, ата-аналарыңды да, өлтіремін" деп сес көрсеткен. Жеткіншектер бір жыл бойы іштен тынып жүрген.
Ел арасында күдіктінің ауыл имамының көмекшісі екені айтылуда. Бірақ облыстың бас имамы бұл деректі теріске шығарып, қол астында ондай қызметкердің мүлдем болмағанын жеткізді.
![](/assets/thumbnails/9e/9ef24a1ed3ef35d6eb3d88d8acc718f7.jpeg ""Күйеуіммен полицияға ұсталып, қамалып отырғанда танысқанмын"")
