Зейнеткер: 45 жыл жиғаныма пәтер алам дегенде, алдап соқты

Нұр-Сұлтанда жылдар бойы әр тиынын есептеп, жетпегесін несиесін рәсімдеп, асыға күткен үйлеріне әупірімдеп жеткен халық енді өз пәтеріне кіре алмай отыр, деп хабарлайды ERNUR.KZ Еуразия бірінші арнасына сілтеме жасап.

Айдың-күннің аманында далада қалғалы тұрған жандардың бірі Гүлдана Аманова.

"Кілтті алып, ремонт жасап, кірдік. Енді естественно ондай крупный ақша қолымызда жоқ. Барамыз да оформлять етіп кредит аламыз. 4 баламен кредитпен осы үйде тұрып жатырмыз. Қазір бізді шығарып жіберсе, менде даже квартира жалдайтын жағдай жоқ. 4 баламен қақаған аязда далада қалайын деп тұрмыз" - дейді қала тұрғыны Гүлдана Аманова.

Елорданың сол жағалауында салынған сақалды құрылысқа тап болып, пәтеріне әрең дегенде қол жеткізген Арман Ниязовтың арманы да ақталмады. Баспанасына таласып, өзгелермен соттасып жүргеніне екі жылдың жүзі болыпты.

"Бес жылдан бері күткен пәтеріміздің кілтін алғанымызда, қуанышымызда шек болмады. Баспанамызға бірден көшіп, жөндеу жұмыстарын бастадық. Кейін бірнеше ай өтер-өтпестен, үйіміздің тағы басқа қожайындары барын білдік" - қала тұрғыны Арман Ниязов.

Даудың басы сонау 2014 жылдан басталған. "Семейный" тұрғын-үй кешенінің құрылысы бітпей жатып, пәтерді 13 отбасы сатып алады. Үйге әне кіресіздер, міне кіресіздер деп мердігер компания уәдесімен тойдырғанда, ескі басшы ауысып, жаңасы келеді. Келеді де, әлгі 13 отбасының үйін басқа біреуге сатып жібереді.

"Отбасымның тұратын үйі жоқ. Мен ойлаған жоқпын 45 жыл еңбек етіп, бір күн де үйде отырған жоқпын. Сөйтіп еңбек етіп, енді зейнетін көрем-ау дегенде мен осындай жағдайға тап боламын деп ойлаған жоқпын" - дейді зейнеткер Гүлзада Әлкенова.

Мәселен, Гүлзада Әлкенова үйді бірінші болып алғандардың бірі. Бірақ Соттың шешіміне сәйкес, енді ол баспананың заңды иесі емес екен.

"Бірінші бізке сатқан сатып алушылардың қағаздарын анулировать етіп тастағанбыз дейді. заңсыз деп тапқан. Қалай ол заңсыз болады?" - дейді зейнеткер.

Ал құрылыс компаниясының басшылығы мәселенің мән-жайын былай деп түсіндірді.

"2018 жылы үйдің құрылысы аяқталған соң, біз пәтерді алдын-ала алған тұрғындардарға хабарластық. Өйткені бұрынғы басшылықтың жүргізген құжаттарына сәйкес, аталған тұлғалар үйдің ақысын толық төлемеген. Сөйтіп қарыздардың толық өтелмеуіне байланысты, біз келісімшартты біржақты үзіп, үйлерді басқа біреулерге сатып жібердік" - дейді құрылыс компаниясының директоры Аян Әлімханов.

Сөйтсе, құрылыс компаниясының алғашқы басшылығы үйді бірінші алған тұрғындарға фискалды чек үлестірмепті. Енді пәтер алуға миллиондаған қаржысын жұмсаған тұрғындар үйдің ақысын төлегендерін дәлелдей алмай жүр. Осы ретте, құзырлы органдар аталған оқиға бойынша қылмыстық істің қозғалғанын хабарлап, болашақта халықты аса мұқият болуға шақырды.

"Пәтер алмас бұрын мердігер компаниядан баспанаға қатысты барлық құжаттарды тексеріп алған жөн. Мәселен, эксплуатацияға берілмеген үйлердің құжаттары болмайды. Осыны да аңғарып алған абзал. Құжаттары рәсімделмеген үйлерде пәтерді екі рет сатып алу деректері жиі кездеседі" - қалалық ПД Тергеу басқармасы басшысының орынбасары, Қайрат Айтеков.

Ал кейіпкерлеріміздің мәселесі қашан шешелітіні басы ашық сұрақ. Бірақ олар әділдік орнамайынша, қайтпаймыз деп бекініп отыр.