​«Жұртқа мені бедеу деп айтып жүр екен»: жас келіншек күйеуі өсек таратты деп ренжулі

көрнекілік сурет: mayak-vologda.ru

"Керегесі кертілген отбасылар жайлы аз сыр шертіліп жатқан жоқ. Айтылмай жатқаны да қаншама?! Әрбіріміздің басымызда кішігірім болса да мәселелер туындап жатады, алайда, оны ары қарай ұлғайтып алмауға тырысып бағамыз. Соның бірі – өзім. Тағдыр басыма қандай сынақ берсе де, мойымай көтеруге тырыстым. Соның арқасында түңіліп кетпей, жарқын болашағымнан үмітімді үзбей, ары қарай өмір сүруге деген құлшынысымды қамшылай түстім" деп сырын ақтарды ERNUR.KZ порталының тағы бір оқырманы.

"Жиырма жасымда алып қашудың құрбаны болғанмын. Бұрын-соңды көрмеген, танымайтын адаммен бір шаңырақтың асытнда тұру өте қиын болды. «Бір-бірімізді жіті танымағандықтан осылай болып жатыр ғой» деп барынша шыдауға, отбасымды сақтап қалуға тырыстым. Алайда, қолымнан келмеді.

Бір жыл бойы бірге тұрсақ та, бір-бірімізге үйренісе алмадық. Екеуміз екі бөлек әлемнің адамдары секілді едік. Сол бір жыл тұрған кезде арамыздағы сезім жайлы да, бала жайлы да сөйлеспеген екенбіз. Тіпті ол маған сөйлемей, ұйықтап қалатын.

Сөйтіп, бір күнде шешім қабылдап, кетуге бел будым. Ата-анам, әрине, ажырасқанымды қалаған жоқ. Бірақ шешіміме қарсылық танытпады. «Онымен өмір сүретін біз емес, өзіңнің өмірің, сондықтан, сен қай шешімді дұрыс деп санасаң, біз де соны қолдаймыз» деген болатын.

Солай мен ата-анамның үйіне қайта келдім. Күйеуім "Неге кеттің?" демеді, артымнан іздеп те келмеді. Ажырасуымызға үнсіз келісіп, құжаттарға кешіктірмей қол қойды. Ол да осы қадамды жасағысы келіп, менің бірінші болып шешім қабылдағаныма қуанған сияқты.

Тұрмыста болсам да, бала сүймеген едім. Оған кімнің кінәсі бар екенін білмеймін. Себебі, мен оны қалаған жоқпын, сондықтан, ол кісіден балам болса екен деп те армандаған жоқпын. Керісінше, баламыз болмағанына қуанатын сияқтымын.

Бірақ, жақында құлағыма бір сыбыс шалынды. Ажырасуымыздың себебін бірінші күйеуім ешқашан өзінен іздемеген екен. Естуім бойынша ол адамдарға «Әйелім бала тууға қабілетсіз, бедеу екен, сондықтан ажырастық. Маған бала тауып бере алатын әйел керек, сөйтіп оның басын босаттым» деп айтып жүрген көрінеді.

Қатты қапаландым осы сөзді естіген кезде.Сонда мен бала сүйе алмайтын бедеу келіншек атандым ба? Қалайша адам дәрігерге бармай, анық-қанығына жетпей мұндай «диагнозды» қоя салады екен деп таң қалдым."