ШЫМКЕНТ: айтыскерлер ұлттық өнердің қазіргі қоғамдағы орнын кеңінен талқылады

Кездесуге Оңтүстік өңірінің танымал айтыскер ақындары Біржан Байтуов, Нұрғали Анапия және Қажымұқан Абзалов, жоғары оқу орны мен техникалық және кәсіптік, орта білімнен кейінгі білім беру орнының студенттері, Ұлттық Ұлан 6506 әскери бөлімшесінің сарбаздары қатысты.

Іс-шараның негізгі мақсаты – жастарды ұлттық құндылықтар мен мәдениетке баулу, олардың патриоттық рухын арттыру, ұлтшылдыққа негіздеу болды. Жастарды ұлттық құндылықтар мен мәдениетке баулу – ұрпақ сабақтастығын сақтау мен олардың рухани дамуына негіз. Бұл үдеріс арқылы жастар халқымыздың тарихын, дәстүрлерін терең түсініп, ата-бабамыздан қалған асыл мұраны құрметтеуді үйренеді. Сонымен қатар, патриоттық рухты арттыру олардың Отанға деген сүйіспеншілігін нығайтып, ұлтшылдыққа тәрбиелейді. Осылайша, жастар елдің болашағы ретінде жауапкершілік сезімін қалыптастырып, ұлттық бірегейлікті сақтауға үлес қосады.

Кездесу барысында ақындар қоғамдағы маңызды мәселелерді көтеріп, айтыс өнерінің жастар арасындағы рөлін кеңінен талқыға алды. Ұлттық рухани жаңғырудың жолдарын айтыс өнері арқылы насихаттап, қатысушылармен ой-пікір алмасты. Осы орайда айтыскер ақын Нұрғали Анапия қазақтың қара домбырасымен көрермен назарына арнауын жолдады.

Сондай-ақ, бұл кездесуде өнерлі жастар да бой көрсетті. Жоғарғы оқу орнының студенттері ән шырқаса, Ұлттық Ұлан 6506 әскери бөлімінің сарбаздары патриоттық өлеңдерді жатқа оқыды.

Ал, жиынға қатысушылар ақындардың өнерін тамашалап, жастарға үлгі болатын өнегелі ойларын тыңдады. Іс-шараның соңында қатысушылар мен айтыскерлер ашық сұхбат құрып, ұлттық өнердің қазіргі қоғамдағы орнын кеңінен талқылады.