Бүгінде кәсіпорында 300-ге жуық адам тұрақты жұмыс орнымен қамтылған.
Шымкенттік «Azala Cotton» фабрикасында 200 жаңа жұмыс орны ашылады, деп хабарлайды ERNUR.KZ.
«Оңтүстік» АЭА аумағында орналасқан мақта иірімін шығаратын елдегі бірегей фабрика қазіргі таңда аралас иірім жіп шығаратын жобаның II кезеңін іске асыруда. Бұл жаңа өндірістік желіні іске қосу, өндіріс көлемін ұлғайтуға және жаңа жұмыс орындарын құруға мүмкіндік береді.
Жобаның II кезеңінің жалпы инвестиция құны 1 960 миллион теңге, өндірістік қуаттылығы жылына – 2,5 мың тонна. Бұл жұмыстар 2019 жылдың соңында басталып, 2020 жылы компания «Бизнестің жол картасы – 2020» мемлекеттік бағдарламасы аясында 1 578 миллион теңге көлемінде қаржы алды.
Қазіргі уақытта құрылыс жұмыстары аяқталды. Атап айтқанда, өндірістік ғимарат салынып, ішкі бөлігін безендіру және жабдықтарды монтаждау жұмыстары жүргізілуде. Жоба жыл соңына дейін іске қосылады деп күтілуде.
Айта кетейік, зауыттағы инвестицияның жалпы көлемі 7,07 млрд. теңге. Бүгінде кәсіпорында 300-ге жуық адам тұрақты жұмыс орнымен қамтылған. Фабриканың өндірістік қуаты жылына 6 мың тонна мақта-мата иірімжібін шығарады. Компания өнімінің 90 пайызы Ресей және Қытайға экспортталады.
