2 сәуір – БҰҰ Бас Ассамблеясы бекіткен Дүниежүзілік аутизм туралы ақпараттандыру күні. Бұл күннің басты мақсаты – аутизм спектрінің бұзылысы (АСБ) бар азаматтардың құқығын қорғау, қоғамда олар туралы түсінікті кеңейту және инклюзивті ортаны дамыту.
Шымкент қаласындағы Қамқорлық №8 арнаулы әлеуметтік қызмет көрсету орталығында «Үміт, сенім бізді алға жетелейді» атты мерекелік іс-шара ұйымдастырылды.
Іс-шара барысында орталық мамандары ата-аналар үшін ашық есік күнін өткізіп, психологтар «Сиқырлы әлем» атты тренинг ұйымдастырды. Сонымен қатар, ата-аналар мен қызмет алушыларға арналған спорттық эстафеталық ойындар мен «Біз біргеміз» флешмобы өтті.
Жиынға қатысқан Шымкент қалалық Жұмыспен қамту және әлеуметтік қорғау басқармасының басшысы Жанат Өтебаева ерекше қажеттіліктері бар балаларға қолдау көрсетіп отырған орталық қызметкерлеріне алғыс білдірді. Ол өз сөзінде ерекше балаларды қоғамға бейімдеу жұмыстарын жандандыруға әрдайым дайын екенін атап өтті.
– Бала, орталық және ата-ана бірлесе жұмыс істесе, оң нәтижеге қол жеткізуге болады. Бүгінгі игі бастамаға атсалысып отырған Қамқорлық орталығының ұжымына алғысымды білдіремін. Ата-аналарға да ерекше балаларын қоғамға бейімдеуге деген ынтасы мен еңбегі үшін рақмет айтамын, – деді басқарма басшысы.
Жиын барысында Жанат Өмірсейітқызы орталыққа қолдау көрсеткен демеушілерге алғыс хат табыс етті. Айта кетейік, 2024 жылы «Қамқорлық» қоры ұйымдастырған байқауда шымкенттік орталық үздік деп танылып, 2 миллион теңге көлеміндегі сыйақыға ие болған еді. Бүгінгі шарада қонақтар ата-аналармен кеңесіп алынған заттардың көрмесін тамашалады.
Жиын соңында ата-аналар мен балалар өз армандары мен тілектерін айтып, көкке шар ұшырды.
![](/assets/thumbnails/9d/9de21c765ddd3bac6caa131b8f65f060.jpg ""Өте көп қарғыс алған адаммын... Сол қарғыс бала-шағама тиді"")
![](/assets/thumbnails/43/439f126e001c1cb0b1c2f9a57b1f21df.jpg ""Жетім жігітке күйеуге тисем екен" деп армандадым"")
