Түркістан облысында 800 мың шаршы метр тұрғын үй пайдалануға беріледі

Түркістан облысында 1,35 млн. шаршы метр тұрғын үй пайдалануға берілген, деп хабарлайды ERNUR.KZ.

Түркістан облысында 2019-2020 жылдары қаржыландырудың барлық көздерінен 1,35 млн. шаршы метр тұрғын үй пайдалануға берілді. Оның ішінде бюджет қаражаты есебінен 200 мың шаршы метрге жуық тұрғын үй құрылысы аяқталып, 3500-ге жуық отбасы баспанамен қамтамасыз етілді. Қазіргі таңда да өңірде бұл бағытта жұмыс өте қарқынды. Бұл жұмыстарды облыс әкімі Өмірзақ Шөкеев жіті қадағалауында ұстап отыр. Өңір басшысы кезекті рет Түркістан қаласындағы құрылыс аумағын аралап, жұмыс барысын бақылады.

Биыл облыс аумағында 800 мың шаршы метрге жуық тұрғын үй тапсыру жоспарланған. Бүгінде оның жартысынан астамы пайдалануға берілді. Жыл қорытындысымен жоспарланған көрсеткішке толықтай қол жеткізіледі.

Бюджет қаражаты есебінен облыста биыл 118 тұрғын үйдің (6 850 пәтер, 442 мың шаршы метр) құрылысы жүргізілуде. Жыл қорытындысымен 58 тұрғын үйдің (3270 пәтер, 204,7 мың шаршы метр) құрылысын аяқтау жоспарланған. Сонымен қатар ауылдарда жеке тұрғын үй салу үшін инженерлік желілермен қамтамасыз етілген 2000-нан астам жер телімі бөлінді.

Әсіресе Түркістан қаласында құрылыс қарқыны өте жоғары. Облыс орталығында 2019-2020 жылдары 400 мың шаршы метр тұрғын үй берілсе, оның ішінде 80 мың шаршы метрден астамы (1536 пәтер) бюджет қаражаты есебінен салынған. Қазір Түркістан қаласы бойынша 98 тұрғын үй, яғни, 6166 пәтердің құрылысы жүргізілуде. Жыл соңына дейін 49 тұрғын үй, 2966 пәтерді пайдалануға беру көзделген. Бұдан бөлек, қала аумағында 45 көпқабатты кредиттік тұрғын үйдің құрылысы басталды. Ол аяқталса, 144,6 мың шаршы метрді құрайтын 2504 пәтер ел игілігіне берілмек.

Елбасының Түркістанды түркі әлемінің орталығына айналдыру жөніндегі тапсырмасы тарихи шаһарды жаңа белеске көтерді. Осыған орай қаланың құрылысына инвестиция салуға ниеттілер көбейді. Тұрғын үй құрылысын жүргізуге көптеген компаниялар мен мердігерлер қызығушылық танытып, 2019-2020 жылдары инвесторлар қаражаты есебінен жалпы сомасы 7,4 млрд. теңгеге жететін 21 көпқабатты үй пайдалануға тапсырылған. Нәтижесінде 40,9 мың шаршы метрді құрайтын 711 пәтер бой көтерген.

Осы жылдың өзінде инвесторлар қаражаты есебінен 65 көпқабатты тұрғын үй (3373 пәтер, 227,1 мың шаршы метр) мен 4 коттеджді қалашықтар (39,7 мың шаршы метр) құрылысы басталып, жұмыс қарқыны арта түсті. Биыл осы салаға бағытталатын инвестицияның жалпы көлемі шамамен 27 млрд. теңгеге жетпек. Бұл бағыттағы жұмыстар алдағы жылдары жоғары қарқынмен жалғасатын болады.

2021 жылы аудан, қалаларда жеке тұрғын үй салу үшін де тиісті жұмыстар қолға алынды. Егерде 2019-2020 жылдар аралығында барлығы 2101 мың жер телімі бөлінсе, биыл 5000-нан астам жер телімін жеке тұрғын үй салу үшін қажетті инфрақұрылыммен қамтамасыз ету жоспарланып, жоспар жүзеге асып жатыр. Ол жоспар толық орындалса, 2019-2021 жылдар аралығында берілген жер телімі 7559-ға жетеді.

Құрылыс нысандарын аралап, осы саладағы жұмыстарды саралаған Өмірзақ Шөкеев тұрғындарды сапалы әрі инфрақұрылымы жасақталған тұрғын үйлермен қамту ісі жалғасатынын жеткізді. Тиісті сала басшылары мен құрылыс компанияларына ел алдындағы міндетті шынайы жауапкершілікпен атқаруды тапсырды.