Түркістан облысында тәжірибе станциясы салынып жатыр

Сарыағашта теңдесі жоқ тәжірибе станциясы салынуда, - деп хабарлайды ERNUR.KZ.

Түркістан облысындағы барлық жылыжайлардың 35 пайызы орналасқан Сарығаш ауданы – тәжірибе алмасу алаңына айналады. Мұнда жыл 12 ай бойы жылыжайдан өнім алудың қыр-сырымен бөлісетін арнайы демостанция салынуда. Қазіргі таңда екі гектар аумақтағы тәжірибе жасайтын жылыжай кешенінің құрылысы аяқталған. Алдағы уақытта оның көлемі екі есе артпақ.

Мұнда студенттер мен фермелердің тәжірибе алмасу орталығы мен жер, топырақ құрамына талдау жасайтын зертхана салынатын болады. Голландия селекциялық компаниясының және «Риик Зван Оңтүстік» ЖШС-нің инвестициясымен жалпы көлемі 4 гектар аумаққа өнеркәсіптік жылыжай және тәжірибе станциясы ашылады. Теңдесі жоқ жобаның негізгі мақсаты – егін шаруашылығы саласында студенттер мен фермерлердің тәжірибе алмасу және жаңа технологиялар енгізу. Жоба аясында 20 адам тұрақты жұмыспен қамтамасыз етіледі.

«Nur Otan» партиясының жол картасы аясында 2025 жылға дейін аудандағы қарапайым жылыжайлардан заманауи өнеркәсіптік жылыжай көлемін ұлғайту мақсатында құрылыс жұмыстары жүргізіліп жатқан жылыжай және тәжірибе станциясы жыл соңында іске қосылады. Құрылыс барысы Сарыағаш ауданының әкімі Мұхит Отаршиевтің бақылауында.