ТҮРКІСТАН: Шілденің алғашқы күні Мақтааралдағы 55 үй салынып бітеді

Мақтааралда шілденің алғашқы күні 55 үйдің құрылысы толық аяқталады, - деп хабарлайды ERNUR.KZ.

Түркістан облысы Мақтаарал ауданында топан судан шардап шеккен үш ауылдың тұрғындарына арналып салынып жатқан жаңа мөлтек ауданның құрылысы қарқынды жүргізіліп жатыр. Мұнда қазір салынып жатқан 386 үйдің 46-сында ішкі әрлеу, 54-інде шатыр жабу, 239-ында қабырға қалау, 77-сінде бірінші жаппасын жабу, 10-ында іргетасын қалау жұмыстары жалғасуда. Жаңадан салынып жатқан 386 үйдің 196-сы үкіметтік резервтен, ал 190-ы қорлар есебінен бой көтеруде.

«Алдағы 1 шілде күні 55 үйдің құрылысы толық аяқталып, 100 үйдің шатыры жабылып бітеді деп жоспарлап отырмыз. Құрылыс қарқыны бір сәтке де бәсеңдеп отырған жоқ. Мердігер мекемелер екі кезеңде жұмыс істеуде. Яғни, күндізгі және түнгі ауысымда жұмыстарын жалғастыруда. Әзірге құрылыс материалдарынан немесе құрылысшылардан тапшылық орын алып отырған жоқ»,- дейді Мақтаарал аудандық сәулет, қала құрылысы және құрылыс бөлімінің басшысы Бижан Анарбеков.

Сондай-ақ, жаңа мөлтек аудандағы 70 гектар аумақта тұрғын үй құрылысынан бөлек, инфрақұрылымдық яғни газ, су, жол, жарық тарту жұмыстары қатар жүргізілуде. 1200 орындық мектеп пен 280 орындық балабақшаның орнын әзірлеу жұмыстары жалғасып жатыр.

Айта кетейік, жаңа мөлтек ауданда 31 мердігер компания мен оның 1507 құрылысшысы еңбек етіп жатыр. Өздеріне тиесілі үйлердің құрылысын жүргізуде жетісайлық «Нүрі-Л- Жетісай» құрылыс компаниясы алдыңғы қатарда келеді. Олар қазірдің өзінде 9 үйдің ішкі әрлеу жұмыстарын бітіруге таяу. Жалпы аталған компания осындағы 20 үйдің құрылысын жүргізу құқығын иеленген болатын. Бүгінде мердігер компанияда 110 құрылысшы мен 20-ға тарта техника тоқтаусыз жұмыс істеп жатыр.