ТҮРКІСТАН: Төлеби ауданына жаңа әкім тағайындалды

Төлеби ауданының әкімі лауазымына Телғараев Төлеген Тұртайұлы тағайындалды, - деп хабарлайды ERNUR.KZ.

ҚР Президенті Әкімшілігінің келісімі және Төлеби аудандық мәслихаты депуттарының қолдауымен Түркістан облысы әкімінің өкімімен Төлеби ауданының әкімі болып Телғараев Төлеген Тұртайұлы тағайындалды.

Т.Т. Телғараев 1973 жылы туылған, білімі жоғары, мамандығы – инженер-механик, экономист-қаржыгер.

Еңбек жолын 1990 жылы Шымкент автокөлік кәсіпорынның құрылыс ауласының бетоншысы ретінде бастаған. Мемлекеттік қызметті өткеруді 1997 жылы Оңтүстік Қазақстан облысы аумақтық жекешелендіру комитеті мемлекеттік акция пакеттер және мемлекеттік қатысу үлесі бөлімінің бас маманы лауазымында бастаған. 2004-2008 жылдары Оңтүстік Қазақстан облысының коммуналдық меншік департаменті жалға беру және жекешелендіру бөлімінің бастығы, осы облыстың қаржы департаментінің мемлекеттік сатып алу бөлімінің бастығы, Оңтүстік Қазақстан облысының жұмыспен қамтуды үйлестіру және әлеуметтік бағдарламалар департаменті еңбек рыногы және квоталау бөлімінің бастығы, Оңтүстік Қазақстан облысының қаржы департаменті директорының орынбасары лауазымдарын атқарған.
2008-2016 жылдары Оңтүстік Қазақстан облысы Қаржы басқармасы басшысының орынбасары болып қызмет еткен. 2016 жылдың сәурінен бастап Қазығұрт ауданының әкімі лауазымын атқарып келген.

Төлеби ауданының жаңа әкімін аппарат жиынында Өмірзақ Шөкеевтің өзі таныстырды.