​Түркістандық мемқызметшілердің жалақысын есептеуде арнайы шкала енгізіледі

ҚР Мемлекеттік қызмет істері және сыбайлас жемқорлыққа қарсы іс-қимыл Агенттігінің Түркістан облысы бойынша департамент басшысы Ғалым Сұлтанұлы Тұрсынбаев Түркістан қаласының мемлекеттік қызметшілері арасында кездесу өткізді, деп хабарлайды ERNUR.KZ.

Жиынға Түркістан облысынан құрылған Арнайы мониторингтік топ мүшелері У.Жүсіпбаев пен А.Оспанов қатысты.

Кездесу барысында сөз алған Ғ.Сұлтанұлы «100 нақты қадам»Ұлт жоспарын жүзеге асыруда мемлекеттік аппараттың тұрақтылығы бағытындаатқарылып жатқан жұмыстарға кеңінен тоқталып өтті.

«Ұлт жоспарының алғашқы бағыты кәсіби мемлекеттік аппарат құру шеңберінде жаңадан «Қазақстан Республикасының мемлекеттік қызметі туралы» және «Сыбайлас жемқорлыққа қарсы іс-қимыл туралы» Заңдары,ҚР мемлекеттік қызметшілерінің Әдеп кодексі қабылданғанын және мемлекеттік қызмет саласында кәсібилікті қамтамасыз етуді жетілдіру мақсатында атқарылып жатқан жұмыстар туралы баяндады.

Сондай-ақ, пилоттық жоба ретінде бірқатар мемлекеттік органдарда факторлық-балдық шкала жүйесі енгізіліп, ондағы мемлекеттік қызметшілердің жалақысы 2-ден 2,5 есеге дейін көтерілгенін және ерекше қосқан үлестері мен жеке бастамалары үшін тиісті кезеңнің қорытындысымен қомақты бонустар төленетіні туралы айтып өтті.

Кездесу барысында, Ғ.Тұрсынбаев Мемлекет басшысының 5 қазандағы Қазақстан халқына арнаған Жолдауында мемлекеттік қызметшілердің жұмыстан кейін қалып, үстеме жұмыс атқаруына жол бермеу мәселесіне ерекше көңіл бөлінгенін атап өтіп, басшыларға қызметшілердің жұмыс уақыты аяқталғаннан кейін уақытылы қайтару үшін жұмыс жүктемесін дұрыс реттеп бөлуді ұсынды.

Бұған қоса, жемқорлықтың алдын алуға бағытталған жұмыстар одан әрі күшейтілетінін ескертіп, мемлекеттік қызметші қызмет атқару барысында және қызметтен тыс уақытта да қарапайым болуы тиіс екенін жеткізді.