27-ге толған Димаш Құдайберген отбасылық ерекше видеолармен бөлісті

Туған күн мерекесіне орай Димаштың YouTube-тегі арнасында оның сәби кезіндегі сирек кездесетін видеолар жарияланды.

Дінмұхаммед Қанатұлы Құдайбергенов 1994 жылы 24 мамырда Ақтөбеде дүниеге келді. 2019 жылдың желтоқсанында оған «Қазақстанның еңбек сіңірген қайраткері» атағы берілді.

Ата-анасы – әнші Света және Қанат Айтбаевтар. Кішкентай Димаш ата-әжесінің тәрбиесінде болған. Бала кезден сахнада ән айтып, фортепианода ойнап, әртүрлі байқауға қатысқан.

Жас әнші алты октаваны қамти алатын вокалдық кең диапазонымен ерекшеленеді.

2015 жылы ол Витебскте өткен «Славян базары» халықаралық байқауында бас жүлдені иеленді.

Дәл осы жылы «Жыл адамы» жалпыұлттық бағдарламасы аясында «Жыл әншісі» атанды.

2016 жылы «Ұмытылмас күн» турнесін өткізді. Алғашқы турнесін Қазақстан Тәуелсіздігінің 25 жылдығына арнап, еліміздің 25 аймағында 25 концерт берді.

2017 жылы Димаш «Hunan TV» қытай телеарнасында өткен «I am Singer» вокалдық байқауының бесінші кезеңіне қатысып, екінші орын алды. Бұл конкурс оған әлемдік деңгейдегі танымалдылық алып келді.

Нұр-Сұлтан қаласында өткен ЕХРО-2017 Халықаралық көрмесі аясында алғаш рет ауқымы кең жеке концертін өткізді. «Bastau» деп аталатын концертіне қазақстандық және шетелдік көрермен жиналды.

2019 жылдың маусымында Д.Құдайберген елордада «Арнау» атты жеке концертін өткізді. Оған 64 мемлекеттен жанкүйерлер келді.

Осы жылдың желтоқсанында Қазақстанның АҚШ-тағы мәдениет күндері аясында және ҚР Мәдениет және спорт министрлігінің қолдауымен Нью-Йоркте Димаштың концерті аншлагпен өтті.

Әнші 2020 жылдың 16 ақпаны мен 4 сәуірі аралығында Еуропа елдері бойынша турне өткізуді жоспарлаған болатын. Алайда коронавирус пандемиясына байланысты оның жекелегені кейінге қалдырылды.