Испанияда "орыс мафиясына" кірген Қазақстан азаматы ұсталды

Құқық қорғау органдары бұл соңғы он жылда "Шығыс Еуропа мафиясына" қарсы ең ірі операция екенін мәлімдеді. Себебі ұсталған адамдардың иерархиялық дәрежесі де жоғары болып тұр.

Тергеу материалдарына сәйкес, қылмыстық топ жемқорлықпен және мемлекеттік институттарға өз адамдарын кіргізумен айналысқан.

"Олар заңгерлер, шенеуніктер, саясаткерлер, бизнесмендер мен хакерлер арқылы мемлекеттік органдарға кіріп алып, испан экономикасының негізгі салаларын бақылауды жоспарлады", - дейді полицейлер.

Осы іске қатысты тергеу шаралары жеті жыл бұрын басталған. 2013 жылы полиция орыс мафиясының өз белсенділігін күшейткенін байқады. Ұйым өкілдері бұрынғы Кеңес Одағы елдерінен шыққан қылмыстық топтардың ақшасын жылыстату үшін пайдаланып, ол ақшаны Испанияда ғана емес, әлем бойынша сан алуан бизнеске салған. Соның ішінде дискотекалар, мейрамханалар мен испан жағалауындағы жылжымайтын мүлік бар.

Қылмыстық топ серкелері күдік тудыратын банк операцияларын жасап, Испанияға қолма-қол ақша кіргізіп отырған. Сол үшін жалған компаниялар мен осы жұмысты істеп беретін адамдарды жалдады.

Құқық қорғаушылар Аликанте, Мадрид, Таррагона мен Ибицада тінту шараларын өткізіп, қару-жарақ, қолма-қол ақшамен 300 мың еуро, 16 автокөлік пен гауһар тастарды тәркіледі. Бұдан бөлек, миллиондаған еуроның есепшоттары бұғатталды.

Қазақстанның сыртқы істер министрлігі өкілдері ақпаратты тексеріп жатқанын жеткізді.