Коронавирус моральдық нормаларды өзгертіп жатыр - шетелдік БАҚ

ERNUR.KZ. «Қолды жиі жуу? Жер шарының екі миллиард тұрғыны суға қол жеткізе алмай отыр. Әлеуметтік қашықтық? Босқындар лагерлерінде 70 млн адам бар. Маска? Маска бай мемлекеттердің өзінде жетіспей жатыр. Босқындар медициналық көмекке қол жеткізе алмай отыр. Ал Еуропа тек қана өз қамын ойлауда. Коронавирус моральдық нормаларды өзгертіп жатыр», деп жазады Польшаның танымал басылымы Gazeta Wyborcza.

Мақала авторының айтуынша, коронавирус пайда болғалы босқындар тақырыбы мүлдем айтылмай, миграциялық кризис БАҚ беттерінен жоғалып кеткен.

«Дағдарыс үнемі осылай болады. Ол жоғалмайды, оны қауіптірек және жылдам әрекет етуді талап ететін басқалары алмастырады. Қазір вирустың кең таралуынан шекаралар жабылды. Әсіресе, босқындардың қозғалысы тыйылды. Дегенмен, олар медициналық көмекке қол жеткізе алмайды. Сондықтан да олар Еуропаға өткісі келеді. Өздері аман қалмаса да, балаларын сақтап қалғысы келеді. Ал Еуропа вирустан сақтану үшін босқындарды да кіргізбейтіні түсінікті», - делінген басылымда.

БҰҰ пандемия кезінде босқындарға көмектесетін қор құру үшін 1,5 млрд доллар жинауға шақырды. Бір жағынан бұл теңіз тамшысындай болғанымен, қазір экономикасы тұралап тұрған елдер үшін едәуір салмақ. Сонымен қатар мемлекеттер өз азаматтарын құтқаруға қаржы салып жатқанын да ескерсек, БҰҰ-ның бұл мәлімдемесі ескерусіз қалуы мүмкін.

Дереккөз: ҚазАқпарат.