Ресей қару-жарақ өндірісін арттырады - Путин

"Өздеріңіз білетіндей, қараша айының басында батыс елдері Украина қарулы күштеріне Батыста өндірілген алыс қашықтыққа арналған қарумен Ресей Федерациясының аумағына соққы беруге рұқсат еткенін жариялады. Біз бұл елдердің қарулы қақтығысқа тікелей қатысуын білдіретінін бірнеше рет мәлімдедік, өйткені НАТО-ның тиісті елдерінің әскери қызметкерлері мен әскери мамандарының тікелей қатысуынсыз бұл қаруды қолдануы мүмкін емес", - деді Путин.

Ресей президенті Мәскеу мұндай шешім шиеленісті ушықтыратынын ескерткеніне қарамастан, америкалық және британ қаруларымен Брянск, Курск облыстарына соққы жасалғанын еске салды.

"Біз ықтимал қарсы тараптың қанша қару-жарақ жүйесі бар екенін, қоймаларда қанша бар екенін және Украинаға қандай көлемде қару-жарақ жеткізілгенін және алдағы уақытта жеткізілетінін де білеміз. Сәйкес зымыран жүйелері мен сәйкес техниканың Ресейдегі өндірісіне келер болсақ, ол бүкіл НАТО елдеріндегі өндірістен 10 есе көп. Бұл көлем келесі жылы тағы 25-30%-ке ұлғайтылады", - деді ресейлік президент.

Ол Киев режимі Батыстан басқа да әскери техника сұрап жатқанын айтты.

"Біздегі қару-жарақ қатарында тұрған және сипаттамалары бойынша әлемде теңдесі жоқ "Калибр" кешендерін, "Кинжал" және "Циркон" гипердыбыстық зымыран кешендерін ескерулері керек. Бұл техникалардың өндірісі жыл сайын ұлғайтылып жатыр және тиісті деңгейде жүріп жатыр", - деді Путин ҰҚШҰ Ұжымдық қауіпсіздік кеңесінің отырысында.