Вакциналар және фавипиравир препаратының 20 мың данасы Өзбекстанға 13 қазанда Стамбұл-Ташкент рейсі арқылы жеткен.
ERNUR.KZ. Түркия үкіметі Өзбекстанға коронавирусқа қарсы қытай өндірген Sinovac вакцинасының 200 мың данасын жөнелтті, деп жазады centralasian.org.
Мәліметке қарағанда, вакциналар және фавипиравир препаратының 20 мың данасы Өзбекстанға 13 қазанда Стамбұл-Ташкент рейсі арқылы жеткен.
Өзбекстанның денсаулық сақтау министрлігі бұл жүк Ташкент пен Анкара арасында қол қойылған медициналық жәрдемге грант беру жөніндегі келісімге сәйкес келгенін мәлімдеді.
Sinovac Өзбекстанда коронавирусқа қарсы қолданылатын алтыншы вакцина болады. Осыған дейін өлкеге AstraZeneca (Ұлыбритания), ZF-UZ-VAC2001 (Қытай), Спутник V (Ресей), Moderna (АҚШ) және Pfizer / BioNTech (АҚШ/Германия) вакциналары жеткізілген. Бұдан бөлек Өзбекстандағы Jurabek Laboratories атты бірлескен кәсіпорын жақында ZF-UZ-VAC2001 және Спутник V вакциналарын өндіре бастағанын хабарлаған.
Өзбек билігінің мәліметіне сәйкес, бүгінгі күнге дейін өлкеде вакцинаның жалпы саны 28 673 528 данаға жеткен.
