Министр комиссия алаңында ЕАЭО-ға мүше мемлекеттердің темір жол әкімшіліктерінің басшыларынан құрылған Үйлестіру комитетін қалыптастыруды ұсынды.
ERNUR.KZ. Еуразиялық экономикалық комиссияда ЕАЭО Үкіметаралық кеңесінің кезекті отырысының күн тәртібіндегі мәселелердің бірі – ұлттық темір жолдардың интеграциялық өзара іс-қимылын дайындау барысы талқыланды, деп жазады sputnik.kz.
ЕЭК энергетика және инфрақұрылым министрі Арзыбек Қожошевтың айтуынша, ЕАЭО елдері темір жолдарының өзара іс-қимылы интеграцияны дамытудың берік негізі болып табылады.
"ЕАЭО елдерінің ұлттық ерекшеліктерін біріктіру және теміржол көлігінің жұмысындағы озық тәжірибені енгізу синергетикалық әсерге қол жеткізуге және көлік саласының қосымша резервтерін ашуға көмектеседі", - деп есептейді ол.
Теміржол интеграциясы мәселесін 2024 жылдың ақпанында Алматыда өтетін Еуразиялық үкіметаралық кеңестің Одаққа мүше мемлекеттердің үкімет басшылары деңгейіндегі отырысында талқылау жоспарлануда, деп мәлімдеді комиссиядағылар.
ЕЭК мәліметінше, мұндай талқылауға Ресей премьер-министрінің орынбасары Алексей Оверчук бастамашы болып отыр.
Үкіметаралық кеңеске мәселені дайындауға арналған отырысқа қатысқан сарапшылар ЕАЭО мемлекеттерінің теміржол әкімшіліктері көліктің басқа түрлерімен салыстырғанда өзара іс-қимылдың ең жоғары деңгейіне ие екенін мәлімдеді.
Теміржол көлігі қалыптастырып отырған көлік саласындағы ЕАЭО-ның табысты жұмысы осы бағытта одан әрі интеграциялау үшін ерекше алғышарттар түзеді, деп есептейді Арзыбек Қожошев.
Министр комиссия алаңында ЕАЭО-ға мүше мемлекеттердің темір жол әкімшіліктерінің басшыларынан құрылған Үйлестіру комитетін қалыптастыруды ұсынды.
Кездесуде олар "Ресей темір жолы", "Қазақстан темір жолы" және "Беларусь темір жолы" арасында ЕАЭО елдеріндегі теміржол көлігінің көліктік-логистикалық әлеуетін үйлестіре дамыту жөніндегі міндеттемелер туралы меморандумға қол қою мүмкіндігін зерделеуге келісті, деп хабарлады комиссиядағылар.
