"Дене шынықтыру пәнінің мұғалімі": Аягөзде жасөспірім қыз туысқан ағасының 11 жасынан бастап зорлап келгенін айтты

Еркеназдың айтуынша, ағасы Еркебек Жұмаханов қыз 6 жаста кезде өзінің жыныс мүшесін көрсетіп, оны порнография көруге мәжбүрлеген.

“11-12 жасымнан бастап зорлап келді. Құзырлы органдарға шағым түсірдім. Қылмыс дәлелденсе де, бір жылдың ішінде тергеу үш рет жабылды. Ол біздің ауылдағы мектепте дене шынықтырудан сабақ береді. Басқа да қыздарды жыныстық қатынасқа түсуге итермелеген. Олар бас тартқан, кейбірі “ұят болады” деп үндемей отыр. Мен сол қыздардың атынан сөйлеп тұрмын. Біз зорланғанымызға ұялмаймыз, керісінше, бізді зорлаған адам ұялсын”, – дейді Еркеназ.

Абай облысындағы балалар омбудсмені Эльзира Жүнісова Еркеназбен байланыста екенін, қазір оған психологиялық көмек пен қолдау көрсетіліп жатқанын айтты.

“Мен Еркеназдың биологиялық анасымен телефон арқылы сөйлестім. Еркеназ психологиялық қолдау орталығынан психологиялық көмек алады. Колледж әкімшілігі жатақханадан бір бөлме берді. Біз Қазақстан Республикасының Бала құқықтары жөніндегі уәкілі Зәкиева Динара Болатқызымен, білім басқармасымен, облыстық прокуратурамен және басқа да мүдделі құрылымдармен бірлесіп жұмыс істейміз. Прокуратура мән-жайды тексеріп жатыр”, – деп жазды Эльзира Жүнісова.

Полиция Еркеназдың ісіне қатысты қылмыстық құқық бұзушылық жоқ болғандықтан іс тоқтатылғанын айтты.

“Аягөз аудандық ішкі істер бөлімі сотқа дейінгі тергеу амалдарын жүргізіп, оқиғаның барлық мән-жайын жан-жақты және толық зерттеді. Тергеу барысында қажет сараптамалар, оның ішінде кешенді комиссиялар жүргізілді. Қорытындысы бойынша қылмыстық құқық бұзушылықтың болмауына байланысты өндірісті тоқтату туралы қаулы шығарылды”, – деп мәлімдеді полиция.

Бұған дейін Ақтөбеде екі баласы бар педагог келіншек оқушымен жыныстық қатынасқа түсті деген күдікке ілінген еді.