Қазақстандық букмекерлер депутат Руслан Берденовті сотқа берді

Букмекерлер депутатты жалған ақпарат таратты деп айыптап Алматы қаласы Бостандық аудандық сотына шағым түсірген.

"Жауапкер, парламент мәжілісінің депутаты бола тұра, ойын бизнесі мен спорттық бәс тігулерді ұйымдастырушылардың іскерлік беделіне нұқсан келтіретін жалған мәліметтерді таратуға бірнеше рет жол берген", – делінген арызда.

Арызданушылардың айтуынша, ар-намысты бұзатын ақпаратты тарату айыпталушының депутаттық қызметі аясында көпшілік алдында сөйлеген сөзінде де, әлеуметтік желілер мен интернет-ақпараттық ресурстар арқылы да болған.

"Жауапкер таратқан жалған ақпарат, басқалармен қатар, реттеу шараларын күшейтуге, саланы және онымен байланысты салаларды монополиялауға, кәсіпкерлік функцияларды делдалдардың пайдасына беруге немесе кәсіпкерлік қызметті шектеуге ақпараттық себеп болды. Атап айтқанда, сотталушы көпшілікке таратқан ақпарат ойын бизнесі және спорттық бәс тігулерді ұйымдастыру саласындағы реттеуді қатайтатын бірқатар заң жобаларын дәлелдеу кезінде пайдаланылды", – делінген арыз мәтінінде.

Қауымдастық уәкілетті органдарға Берденов таратқан ақпараттарға қатысты деректер мен статистикалық мәліметтерді ұсыну туралы сауалдар жолдаған.

“Бас прокуратураның жауабында құмар ойындарға негізделген өз-өзіне қол жұмсау және құмар ойындары негізінде тіркелген қылмыстық құқық бұзушылықтар туралы статистикалық есептерді жүргізбейтіні айтылған. Қазақстанда қазірдің өзінде 350 мыңға жуық қазақстандықтың құмар ойындарға тәуелді екені туралы деректер расталмады. Өйткені денсаулық сақтау министрлігінің жауабында 2023 жылдың сегіз айындағы ресми статистикаға сай, осы диагнозбен 10 адам динамикалық бақылауда болған. Бір қазақстандық құмар ойыншыға шаққандағы қарыздың орташа сомасы 10 миллион теңге шегінде есептелетіні туралы мәліметтерді де ұлттық банк растамаған. Ажырасудың негізгі себебі ретінде "ойынға тәуелділік" және "ойынға тәуелді балалар туралы" деректері расталмады. Өйткені мұндай деректер оқу-ағарту министрлігінде де, әділет министрлігінде де жоқ”, – делінген арызда.

Олар соттан Берденов таратқан жалған ақпаратты ойын бизнесін ұйымдастырушы заңды тұлғалардың іскерлік беделіне нұқсан келтірді деп тануды, ойын бизнесін ұйымдастырушылардың іскерлік беделіне нұқсан келтіретін оның таратқан жалған ақпаратын теріске шығаруға міндеттеуді, сондай-ақ бірлестіктің пайдасына сот шығындарын өндіріп алуды талап еткен.

Еске салсақ, бұған дейін Қазақстанда букмекерлік кеңселер мен казинолар құмар ойындардың қаупі туралы ескертуге міндеттелетіні туралы жазған едік.