"Әлеуметтік желіде тараған әріптестерімнің видеосы көпшілікті қайран қалдырды".
ERNUR.KZ. Денсаулық сақтау вице-министрі Камалжан Надыров алматылық дәрігерлердің коронавирус тестілеуіне қатысты наразылығы бойынша пікір білдірді, деп жазады ҚазАқпарат.
Вице-министр бұл туралы Facebook парақшасында жазды.
«Өкінішке қарай, бүгін әлеуметтік желіде тараған әріптестерімнің видеосы көпшілікті қайран қалдырды. Министр осыған байланысты Алматыда іссапарда жүрген маған дәрігерлермен кездесіп, мәселені объективті түрде шешуді тапсырды. Кездестім, сөйлестім. Жағдай мынадай: Дәрігерлердің қауіпсіздігі үшін министрлік оларды жиі-жиі коронавирусқа тестілеуден өткізу жөнінде шешім қабылдаған. Алайда бүгін кездейсоқ жағдай орын алып, екі дәрігердің аты-жөні бірдей болып шықты. Оның үстіне базада екеуі бір ауруханада жұмыс істейді деп тұр. Сөйтіп тестілеу нәтижесін жариялайтын кезде қате кеткен. Біз оқиғаның мән-жайын анықтадық, енді бәрі өз орнына келді. Соңында әйтеуір ешкім зардап шеккен жоқ. Дау-дамай шешілді», - дейді вице-министр.
Оның айтуынша, министрлік бұл істен қорытынды шығарып, бұдан былай тестілеу нәтижесін беретін кезде қосымша тексеру жүргізіледі.
«Адам факторын барынша азайтамыз. Жағдайды пайдаланып, әріптестеріме алғыс айтып, қолдау көрсеткім келеді. Тезірек қатарға қосылып, халыққа көмек көрсете беріңіздер. Әріптестер, бүгінгі күні сіздердің бірлігіңіз бәрінен маңызды», - деп жазады Камалжан Надыров.
