Қостанайда фельдшерді аяусыз ұрған әйелдер сотталды

02.04.2025 18:20

295

Соққы салдарынан фельдшерге «ми шайқалуы», самай тұсындағы гематома, бетінде көгерулер мен сызаттар диагнозы қойылып, ол ауруханаға жатқызылды.

фото:Ашық дереккөзден

ERNUR.KZ. Қостанайда фельдшерді соққыға жыққан екі әйелге қатысты сот үкімі шықты, деп жазады ulysmedia.kz.

Өткен жылдың желтоқсан айында жедел жәрдем бригадасы шақырту бойынша барған. Әйел адам ентікпе мен жүрек тұсындағы ауырсынуға шағымданған. Фельдшер Анель Баймурзинаның айтуынша, олар барған сәтте-ақ науқастың туыстары агрессия танытып, медициналық қызметкерлерге кедергі келтіріп, қорқытып-үркіткен.

- Бізді қарғап-сілеп, түрмеге отырғызатынын айтты. Кейін науқастың жағдайы күрт нашарлап, тыныс алуы мен жүрек соғысы тоқтап қалды. Біз дереу реанимациялық шараларға кірістік. 30 минут бойы әрекетіміз нәтиже бермеген соң, қайтыс болғанын хабарлап, туыстарына көңіл айттық. Сол сәтте олар маған шабуылдай бастады – тепкілеп, шашымнан сүйреп, ұрды, дейді Анель Баймурзина.

Оқиға орнына полиция қызметкерлері шақырылған.

Соққы салдарынан фельдшерге «ми шайқалуы», самай тұсындағы гематома, бетінде көгерулер мен сызаттар диагнозы қойылып, ол ауруханаға жатқызылды. Кейін полицияға арыз жазған.

Қостанай қалалық соты 41 және 51 жастағы екі апалы-сіңлілі әйелді кінәлі деп танып, әрқайсысын 1 жылға бостандығын шектеу жазасына кесті. Сонымен қатар, олар моральдық шығын ретінде 1 миллион теңге өтемақы төлеуге және сот шығындарының барлығын өтеуге міндеттелді. Үкім жарияланған кезде айыпталушылар сот залында балағат сөздер айтып, тәртіпсіздік танытқан.