Құдайбергенов Тоқаевтың кеңесшісі болып тағайындалды

ERNUR.KZ. Қазақстан президентінің кеңесшісі болып белгілі экономист Олжас Құдайбергенов тағайындалды. Бұл туралы әлеуметтік желіде саясаттанушы және кәсіпкер Ербол Еділов хабарлады. Олжас Құдайбергенов бұл ақпаратты растады, деп жазады sputniknews.kz.

"Бұл рас. Сейсенбі, үшінші желтоқсанда тағайындалдым", - деді Құдайбергенов.

Құдайбергеновтың айтуынша, президент оған экономикалық сұрақтар бойынша штаттан тыс кеңесші болуды ұсынған.

Оның сөзінше, штаттан тыс кеңесші лауазымы – қоғамдық қызмет, сондықтан жалақы төленбейді, Ақордадан кабинет берілмейді.

Олжас Құдайбергенов туралы не білеміз?

Экономист Олжас Құдайбергенов 37 жасында Қазақстан президентінің штаттан тыс кеңесшісі болып отыр.

Қазіргі уақытта ол CSI консалтингтік компаниясының аға серіктесі. 2014 жылы Ұлттық банктің төрағасы Қайрат Келімбетовтің (қазір "Астана" халықаралық қаржы орталығының басшысы - Sputnik) кеңесшісі болды.

"Атамекен" ұлттық кәсіпкерлер палатасы төралқасының жанындағы экономикалық сарапшылық кеңестің мүшесі.

Құдайбергенов 1982 жылы 21 маусымда Түркістанда туған. Үйленген, балалары бар.

2001 жылы Яссауи атындағы халықаралық қазақ-түрік университетін "Халықаралық экономикалық қатынастар" мамандығын бойынша бітіреді. Бұдан бөлек КИМЭП университетінде білім алған.

Экономиканың түрлі секторында басшылық қызметтерде істеді.