Қызылорда облысында газ баллоны жарылып, төрт адам қаза тапты

Қызылорда облысындағы Жосалы кентінде газ баллоны жарылып, төрт адам қаза тапты. Бұл туралы Қызылорда облысының әкімі Гүлшара Әбдіқалықова Facebook-тегі парақшасында жазды, деп хабарлайды ERNUR.KZ.

«Бүгін Қармақшы ауданы Жосалы кенті Рүстембеков көшесі 29 мекенжайындағы жеке тұрғын үйде сағат 13:30 кезінде 27 литрлік газ баллоны жарылып, 144 ш.м. жер өртке оранды. Оқиға салдарынан 4 адам қаза тапты: С.Өміртаева (2001ж.), Р.Айтмаханова (1981ж.), Н.Айтмаханова (2000ж.), С.Мырхиев (1999ж.). Өрт сөндіру бөлімшесі келгенге дейін 1950 жылы туған С.Алмаханова хирургия бөлімшесіне жатқызылған», - деп жазды Гүлшара Әбдіқалықова.

Өртті сөндіруге ТЖД (16 қызметкер және 4 бірлік техника), ӨКМ (20 қызметкер және 4 бірлік техника), ЖАО (10 қызметкер және 3 бірлік техника), прокуратура (3 қызметкер, 1 бірлік техника), БСМК (8 қызметкер және 3 бірлік техника), КРЭК (3 қызметкер және 1 бірлік техника) жұмылдырылды.

«Қайтыс болған азаматтардың туған-туыстарына Сыр елі жұртшылығы атынан қайғыра көңіл айтамын. Бұл бәрімізге де жеңіл тимеді. Қазіргі таңда осыған байланысты мәселе менің тікелей бақылауымда тұр. Өрттен, судан, басқа да апаттан аман болайықшы, жерлестер», - деп жазды Гүлшара Әбдіқалықова.