ОСК қала мен аудан әкімдерін сайлау қорытындысын жариялады

06.11.2023 13:39

887

5 қарашада өткен әкімдер сайлауында сайлаушылардың 63 пайызы дауыс берген.

ERNUR.KZ. Орталық сайлау комиссиясы облыстық маңызы бар 3 қала мен 42 ауданның әкімін сайлау қорытындысын жариялады, деп жазады sputnik.kz.

5 қарашада президенттің бастамасымен алғаш рет аудандар мен облыстық маңызы бар қалалардың әкімдерін сайлау өтті. Облыс мәслихаттары осы сайлауды өткізу үшін 42 аудан мен 3 облыстық маңызы бар қаланың тізбесін бекітті.

1553 сайлау комиссиясы: 17 облыстық, 3 қалалық, 42 аудандық және 1491 учаскелік сайлау комиссиялары жұмылдырылды.

"Сайлау балама негізде өтті. Сайлау бюллетеньдеріне 125 кандидат енгізілді. Сайлаушылардың келуі – 62,79 %. Сайланған әкімдердің орташа жасы 46,7 жасты құрайды", - деп хабарлайды Орталық сайлау комиссиясы.

ОСК сайлау науқаны республиканың сайлау заңнамасының талаптарына сәйкес өткенін атап өтті.

Дауыс беру күні сайлауды кандидаттардың сенім білдірген өкілдері, байқаушылар және БАҚ – барлығы 8 500-ге жуық адам бақылаған.

Бұған дейін қазақстандықтар ауыл әкімдерін сайлаған еді. Енді президенттің тапсырмасымен алғаш рет облыстық маңызы бар қала мен аудан әкімдерінің сайлауы өтті. Оны алдымен пилоттық режимде ұйымдастырды. Одан кейін барлық республикаға таратады. Осы жолы 3 облыстық маңызы бар қала мен 42 аудан әкімі сайланды.