"Принтерде басып шығарылған". Қызылордалық жалған 20 мың теңгеліктермен төлем жасаған

ERNUR.KZ. Қызылорда қаласының 28 жастағы тұрғыны номиналы 20 000 теңгелік бірнеше банкноттарды сақтағаны және оларды жанар-жағармай құю бекеті мен автобөлшектер сататын дүкенге өткізгені үшін айыпталды, - деп жазады Tengrinews.kz.

Жалған банкноттарды сақтау және бірнеше рет өткізу дерегі анықталып, ҚМА Қызылорда облысы бойынша департаменті қылмыстық істің тергеуін аяқтап, іс материалын сотқа жолдаған.

"Ол заттар сатып алып, құны 20 000 теңгелік банкнотты өткізе отырып, қайтарымына ҚР Ұлттық банкінің түпнұсқа банкноттарын алып отырған. Тұрғын өз кінәсін толық мойындады. Криминалист мамандардың зерттеуі барысында өткізілген банкноттардың Ұлттық банктің ақша белгісіне сәйкес келмейтінін және ақшалардың принтерде басып шығарылғандығы анықталды", - делінген хабарлмада.

Айта кетейік, ҚР ҚК-да бұл қылмыс үшін бес жылдан 10 жылға дейінгі мерзімге бас бостандығынан айыру жазасы түрінде жауаптылық көзделген.