Алматыда амплитудасы 9 балл және одан жоғары жойқын жер сілкінісі болған жағдайда тұрғын үйлердің 30%-ға дейін қирауы мүмкін екені айтылды.
ERNUR.KZ. Төтенше жағдайлар бірінші вице-министрі Ибрагим Күлшімбаевтың айтуынша, Алматыда қаланың бір ғана ауданы азды-көпті қауіпсіз деп саналады, деп жазады zakon.kz.
Төтенше жағдайлар жөніндегі бірінші вице-министр Ибрагим Күлшімбаев Алматы Қазақстанның сейсмикалық қауіпті аймақтарының бірі екенін, қала тектоникалық плиталардың 27 сынығында орналасқанын мойындады.
"Жер сілкінісі қаланың барлық таулы аймақтарына әсер етеді. Оның арасында Түрксіб ауданы салыстырмалы түрде ең қауіпсізі болып саналады. Қалғандарында қирау қауіп жоғары", - деді Ибрагим Күлшімбаев.
Сонымен қатар ол болжам бойынша Алматыда амплитудасы 9 балл және одан жоғары жойқын жер сілкінісі болған жағдайда тұрғын үйлердің 30%-ға дейін қирауы мүмкін екенін айтты.
Бірінші вице-министр жер сілкінісі болған жағдайда аман қалу мүмкіндігін арттыру үшін қайда тығылған дұрыс екенін де қоса кетті.
"Тұрғын үйлердегі ең қауіпсіз орындар - көтергіш қабырғалардың асты. Баспалдаққа жүгіріп шығуға болмайды, ол - ең қауіпті жер. Түркияда қайтыс болғандардың біразы баспалдақпен түспек болғанын байқадық. Сондықтан пәтерде, қабырғалардың қасында қалған дұрыс. Себебі жүк көтергіш қабырғалар құлағанда саңылаулар жасайды, сонда үйінді астынан аман қалу мүмкіндігі көбірек", - деді Ибрагим Күлшімбаев.
Бұған дейін президент Қасым-Жомарт Тоқаев Алматы қаласының сейсмикалық қауіпсіздігін қамтамасыз ету шараларын бекіткен еді.
![](/assets/thumbnails/9e/9ef24a1ed3ef35d6eb3d88d8acc718f7.jpeg ""Күйеуіммен полицияға ұсталып, қамалып отырғанда танысқанмын"")
