Шымкентте коронавирус инфекциясын жұқтырған жүкті әйел алғаш рет сұхбат берді

29.05.2020 11:08

1 169

36 жастағы Иринаның ай күні жақындап, босануға дайындалуда.

Шымкентте коронавирус инфекциясына шалдыққан науқас алғаш рет сұхбат беріп, басынан өткен жағдайды баяндап берді, деп хабарлайды ERNUR.KZ.

Қауіпті дертке шалдыққан жүкті әйел отбасымен бірге оқшауланып, ауруханада екі аптадан аса ем қабылдаған. Кейін тағы 15 күндей үй карантиніне жатқызылған. Ай күні босануға жақын қалған аяғы ауыр келіншек коронавирус инфекциясы туралы не дейді? Бір ай бойы қауіпті індетпен алысқан әйелдің құрсағындағы сәбиінің жағдайы қалай?

Коронавирусқа шалдыққан 36 жастағы Иринаның ай күні жақындап, босануға дайындалуда. Дертке шалдыққан шымкенттік әйелге инфекция үйіндегі жолдасынан жұғыпты. Бұған қоса, аяғы ауыр келіншектің екі баласынан да аты жаман ауру анықталып, бүкіл отбасы мүшелерін оқшаулап емдік шараларын жүргізу үшін дәрігерлер бір жанұядағы науқастарды провизорлік станционарға жатқызған.

Ирина, Шымкент тұрғыны: "Ауруханаға түскенде кішкентай балаларымыз арнайы кастюмдегі дәрігерлерді көргенде, шошып жатты. Осы кезде біз баларымызға қарап, әкесі екеуіміз мықты болуға тырыстық. Уақыт өте келе қауіпті дертті жеңіп шықтық. Мен жүкті болғандықтан, дәрігерлер менің және іштегі шаранамның жағдайын ерекше бақылап отырды. Ең бастысы, инфекция ішімдегі балаға әсер етпепті".

COVID-19-дан жазылып шыққан аяғы ауыр келіншек қазір балаларына барынша көңіл бөліп жүр. Бір сәт болсын, бала-шағасын қараусыз қалдырғысы келмейді. Отбасымен қауіпті індеттен толығымен айығып шыққанымен, азаматшаның іштегі үрейі әлі басылмаған сияқты.

«Біз коронавирустан жазылып шықтық. Бірақ ауруханадағы карантиндік жағдайды есіме алсам, үрейленген сәттерім есіме түседі. Жан жағы жабық төрт қабырғаның ішінде жату кішкентай балалармен қиын болды. Бұл жағдайды бастан өткізбей, ешкім түсіне алмайды. Аурудың бар екеніне сенбей жүрген азаматтарға айтарым, салғырттық танытпаңыздар. Өзіңізді ойламасаңыз да, басқаларға зияндарыңыз тимесін», - дейді Ирина.

Ирина сияқты жүкті әйелдердің арасында ковид 19 диагнозы расталған қала бойынша 15 жағдай тіркелген. Елімізде төтенше жағдай режимі алынғанымен, Шымкентте инфекцияға шалдыққандардың саны күн санап артып барады. Мамандар мұның себебін жоспарлы тескерумен байланыстырады.

Айта кетейік, бүгінге дейін Шымкентте вирусты инфекцияны жұқтырудың 730 жағдайы тіркелген. Дертке шалдыққандардың басым бөлігі 50 жасқа дейінгі азаматтар. Ал COVID-19 диагнозын жеңіп шыққандар саны 241 адамға жетті.