Биыл 48 мектептің құрылысы жүргізілуде.
2023 жылы Шымкентте үш ауысымды мектеп мәселесі толығымен шешіледі, деп хабарлайды ERNUR.KZ.
Бұл туралы қала әкімі Мұрат Әйтенов жергілікті мәслихат депутаттарының кезекті ХХІІ сессия отырысында жасаған есебінде айтты.
Айта кетейік, былтыр шаһарда 25 мектеп пайдалануға берілсе, биыл 48 мектептің құрылысы жүргізілуде. 37 мектеп пайдалануға берілді, оның төртеуі мемлекеттік. Нәтижесінде үш ауысымды мектептер саны 9-дан 4-ке, ыңғайластырылған мектеп саны 4-ден 3-ке дейін азайды.
Шаһарда «Балалар жылына» орай, бірқатар маңызды шаралар қолға алынды. Атап айтатын болсақ, 105 мыңнан астам бастауыш сынып оқушылары көп жылдан бері алғаш рет тегін ыстық тамақпен қамтылса, 58 мыңнан астам оқушыға мектеп формасы берілді.
Сонымен қатар, қала бойынша балалардың үйірмелермен қамту көрсеткіші жан басына қаржыландыру есебінен 45%-дан 75%-ға жетті.
Бүгінгі таңда шаһарда «Оқушылар сарайы», «Балалар шығармашылық мектебі», балаларға арналған 157 ойын алаңы мен 40 спорт алаңша құрылысы жүргізілуде.
