«Ерен еңбегі үшін» медалімен марапатталды

фото: facebook.com

Тәуелсіздік күні мерекесіне орай Түркістан облысында өткен салтанатты жиында Арыс қалалық мәслихат хатшысы Амантай Алтынбекұлы Байтанаевты Облыс әкімі Жансейіт Түймебаев «Қазақстан Республикасының Президенті Н.Ә.Назарбаевтың 2018 жылғы 5 желтоқсандағы Жарлығы бойынша «Ерен еңбегі үшін» медалімен марапаттады , деп хабарлайды ERNUR.KZ тілшісі.

Түркістан қаласында Қазақстан Республикасының Тәуелсіздігі күніне арналған «Тәуелсіздік – тұғырым!» атты мерекелік іс-шара өтті. Еліміздің ең ұлық мерекесіне жиылған жұртшылықты Түркістан облысының әкімі Жансейіт Түймебаев құттықтап, Тәуелсіздік туралы тебіреністерін ортаға салды.

«Тәуелсіздік — ұлы ұғым. Жұмыр жер бетінде азаттығын аңсап, бостандыққа қол жеткізе алмай жүрген ұлттар көп. Жыл, ай емес, минут сайын құбылатын алмағайып заманда Қазақстанымызбен мақтанып қана қоймай, тәуелсіздігімізді тұғырлы ету үшін баршамыз еңбек етуге тиістіміз. Биыл Тәуелсіздік күні мерекесін жаңа облыс орталығы - Түркістан қаласында тұңғыш рет атап өтудеміз. Бұл да тарихи оқиға. Бүгінде Елбасымыздың қолдауымен Түркістанымыз түрленіп, облысымыздың әлеуеті көтеріліп келеді. Жыл басынан бері өнеркәсіп өнімінің көлемі 409,6 млрд. теңгені құрады. Ауыл шаруашылығының жалпы өнім көлемі 508,2 млрд. теңгеге жетсе, шет елдерге ет 6,2 мың тонна ет экспорттаған облысымыз бұл көрсеткіш бойынша республикада 1-орынды иеленді. 11 айда құрылыс жұмыстарының көлемі 110 млрд. теңгеге, ал, пайдалануға берілген тұрғын үйдің жалпы алаңы 374,8 мың шаршы метрді құрады. Қазірдің өзінде «Риксос» қонақ үйі мен іскерлік орталығының қазығы қағылды. Таяуда Түркістан қаласында 30 ірі нысанның құрылысы басталады. Елбасымыздың қолдауымен Түркістанның тынысы ашылып, жаңа мақсаттар мен межелер айқындалуда. Баршаңызды Тәуелсіздік күнімен құттықтай отырып, отбасыларыңызға амандық, игі бастамаларыңызға сәттілік тілеймін», - өңір басшысы еңбегімен дараланған 55 адамға түрлі марапаттарды салтанатты түрде тапсырды.

Мерекелік кеште Түркістан облысының «Қазына», «Тұмар» би ұжымдары мен облыстық опера және балет театрының өнерпаздары «Атамекен» хореографиялық композициясын ұсынды. Жезтаңдай әншілер «Айналдым елім», «Қазағым», «Нұр-Астана», «Қалам менің – Түркістан», «Отан», «Қазақстаным» және өзге де патриоттық әндерді шырқады.

Бойға жігер, жүрекке жалын беретін кешке қатысқан көпшілік Тәуелсіздікті тұғырлы, Түркістандағы бастамаларды ғұмырлы етуге уағдаласып, көтеріңкі көңіл-күйде тарқасты.