ТҮРКІСТАН: Мақтааралдық тұрғынды жабылып ұрып, тонап кеткендер ұсталды

Түркістан облысы полицейлері тұрғынды ұрып-соғып, тонап кеткен күдіктілерді құрықтады, - деп хабарлайды ERNUR.KZ.

Түркістан облысы Мақтаарал аудандық полиция бөліміне орталық ауруханаға дене жарақатымен ер адам түскені туралы хабарлама келіп, полицейлер шұғыл оқиға орнына жетеді. Дене жарақатын алған жергілікті тұрғын полицейлерге өзін белгісіз адамдар ұрып-соғып, қалтасындағы телефоны мен ақшасын тартып алғандығын айтып, арызданады. Аталған жайт ҚР Қылмыстық кодексінің 191-бабы «Тонау» бойынша тіркеуге алынып, қылмыстық іс қозғалды. Жәбірленушіге келтірілген шығын көлемі 130 000 теңгеден асады.

Белгілі болғандай, жәбірленуші ер адам Мырзакент кентіндегі азық-түлік дүкенінің жанынан өтіп бара жатқанында жол бойында тұрған өзіне таныс емес төрт жігіт тоқтатып, спирттік ішімдік әкеліп беруін талап етіп, мұны қорқыта бастайды. Жәбірленуші болса, өзінің өміріне қауіп төніп тұрғанын сезіп, сол маңдағы саябаққа қарай қашқан. Алайда жігіттер соңынан қуып жетіп, бірнеше соққы беріп, ұрып-соғу әрекетін жасайды. Содан кейін, дәрменсіз күйде жатқан жәбірленушінің қалтасындағы 90 мың теңгелік ұялы телефоны, 32 мың теңгелік сим картасы және 10 мың теңге ақшасын алып қойған.

Нәтижесінде, жедел-іздестіру шараларына аудандық полиция бөлімдерінен тәжірибелі полицейлер тартылып, күдіктілердің «ізін суытпай» ұстады. Олардан айғақты зат ретінде ұялы телефон мен сим карта алынды. Күдікті болған төрт адамның екеуі қамауға алынып, үшіншісі кепілмен босатылса, біреуінің осы іске қатыстылығы тексеріліп жатыр.

«Қазіргі таңда аталған жайт ҚР ҚК-нің «Тонау» бабымен тіркеліп, Мақтаарал аудандық полиция бөлімі тергеушілерімен тергеу амалдары жүргізілуде”, - делінген полиция департаментінің мәліметінде.