Түркістандықтар Астананың 20 жылдығын атап өтті

ERNUR.KZ. Түркістан облысында Елордамыз – Астананың 20 жылдық мерекесіне арналған «Асқақатай бер, Астана!» атты салтанатты іс-шарасы өтті, деп хабарлайды ERNUR.KZ Түркістан облысы әкімдігінің баспасөз қызметіне сілтеме жасап.

Жиынға облыс әкімі Ж.Түймебаев, облыстық маслихат хатшысы Қ.Балабиев, «Нұр Отан» партиясының облыстық филиалы төрағасының бірінші орынбасары Н.Жолдас, аумақтық басқармалар мен департамент басшылары, зиялы қауым өкілдері және Түркістан қаласының қонақтары мен тұрғындары қатысты.

Шара Астана қаласының 20 жылдығына арналған көрмемен бастау алды. Онда Елордамыздағы әсем де, сәулетті ғимараттардың нобайы бейнеленген түрлі бұйымдар жұрт назарына ұсынылды.

Салтанатты жиында аймақ басшысы Астана қаласының ел тарихында алар орнын екшеп, айтулы күнге орай өңірімізде өткізілген шараларды атап өтті.

«Астана – Қазақстан тәуелсіздігінің Ұлы тұғыры. Елорда – Елбасы идеясының іске асырылуы және барлық Қазақстан халқы еңбегінің нәтижесі. Астананың қалыптасуы Тәуелсіздік шежіресімен тығыз байланысты және мемлекетіміздің бүгінгі жетістіктерінің символы болып табылады. Елдің көңіл қуанышына айналған ару қаламыздың мерей тойына орай өңірімізде «Ел жүрегі – Астана» атты 532 іс-шара өткізілді. Елорда құрметіне орай облыстың бірқатар елді мекендерінде 26 көшеге «Астана» атауы берілді. «Елордаға сыйлық» жобасы бойынша Түркістан облысы тарапынан Астана қаласына тарту ретінде жалпы құны 766,2 млн. теңгені құрайтын 5,2 шақырым веложол нысаны салынды. Сонымен қатар, ағымдағы жылдың соңына дейін облыс көлемінде бірқатар әлеуметтік нысандар, тұрғын үйлер, білім беру нысандары, мәдениет үйлері, спорт кешендерінің ашылу салтанаты Астана қаласының 20 жылдығы мерейтойымен орайластырылуда», – деді Жансейіт Қансейітұлы.

Жиын барысында облыс әкімінің қолынан 24 азамат Оңтүстік Қазақстан облысының «Құрметті азаматы» атағын алды. Олардың қатарында ҰОС және еңбек ардагерлері, Парламент және облыстық мәслихатының депутаттары, заң қызметкерлері, білім, мәдениет және спорт саласының өкілдері бар. Атап айтсақ еңбек ардагерлері Асқар Құлыбаев, Омаров Оразалы, Тойжанов Ділдәбек, Парламент Сенатының депутаты Әли Бектаев, кәсіпқой боксшы Бейбіт Шуменов, «Қазақ күресі» Бүкіл әлемдік федерациясының бірінші вице-президенті Серік Төкеев, «Болашақ» үздіксіз білім беру орталығының директоры Саттар Қуашбай. Сондай-ақ, өңірдің дамуына сүбелі үлес қосқан 30-ға жуық азамат «Астанаға 20 жыл» медалімен марапатталды.

Мерекелік шараның соңы өңіріміздің өнерпаздары дайындаған концерттік бағдарламасына ұласты.