Ақша жымқырғаны үшін іздеуде болған Қазақстанның еңбек сіңірген қайраткері Аргентинада ұсталды

Өткен жылдың жазында Қазақстанның еңбек сіңірген қайраткеріне қылмыстық кодекстің 189-бабының 4-бөлігі “Бөтеннің мүлкін иемдену немесе жымқыру” бойынша халықаралық іздеу жарияланды. Астана қаласының сыбайлас жемқорлыққа қарсы қызметі Хазбулатовқа іздеу салды.

Ер адам 196 миллион теңгеден астам қаражатты заңсыз иемденді деген күдікке ілінді.

Андрей Хазбулатов – философия ғылымдарының докторы, Қазақстанның еңбек сіңірген қайраткері. Қазақстанның 2050 жылға дейінгі мәдени саясатының тұжырымдамасы мен "Кинематография туралы" заңның авторлары мен әзірлеушілерінің бірі. Түркістан қаласын дамытуға рұқсат беру құжаттамасын дайындау бойынша ЮНЕСКО-ның халықаралық сараптау тобының мүшесі. "Қазақ ғылыми-зерттеу мәдениет институты" ЖШС бас директоры, "Күлтөбе қалашығының тарихи нысандарын қалпына келтіру" жобасының ғылыми жетекшісі.

АҚШ, Ресей, Италия елдерінің жетекші оқу орындарында ғылыми тағылымдамадан өткен. 2009-2014 жылдар аралығында Т.Жүргенов атындағы Қазақ ұлттық өнер академиясында білім беру саласында оқытушылықтан ғылыми жұмыстар жөніндегі проректор қызметін атқарды.

2014-2019 жылдары мәдениет және спорт министрлігінің құрылымында жұмыс істеді. Мемлекеттік және басқа да наградалардың иегері. Мәдени мұра саласындағы 50-ден астам ғылыми жарияланымның және үш монографияның авторы.