Елімізде тұлғаларға мемориалдық тақта орнату ережесі өзгертіледі

ERNUR.KZ. Қазақстанда көрнекті тұлғаларға арналған мемориалдық тақта орнату ережесі өзгертілмек, деп жазады ulysmedia.kz.

Құжатта әкімдіктердің мәліметінше, мемориалдық тақталар аймақтарда жиі орнатыла бастағаны айтылған. Сондықтан министрлік "артық жағдайларды" жою үшін ережелерге өзгертулер енгізу туралы шешім қабылдады.

Енді мемориалдық тақтаны ашу үшін көрнекті тұлғаның ғимаратта 10 жылдан астам уақыт тұрғанын немесе жұмыс істегенін растайтын фактісі болуы қажет.

Мемориалдық тақталар мемлекет тәуелсіздігін нығайтуға ерекше елеулі үлес қосқан немесе айтулы тарихи оқиға жасаған тұлғаларды қоспағанда, көрнекті тұлға қайтыс болған күннен бастап бес жыл өткеннен кейін ғана орнатылады.

Тақталар көрнекті тұлғалардың мерейтойлары мен есте қаларлық даталарына, сондай-ақ үкімет қаулысымен белгіленген айтулы тарихи оқиғаларға орнатылады.

Жаңа ережеге сәйкес, бір елді мекенде бір көрнекті тұлғаның немесе айтулы оқиғаның бір ғана мемориалдық тақтасын ашуға болады.

Құжат 26 қарашаға дейін қоғамдық талқылауда болады.