Келер жылдан бастап қант қызылшасын субсидиялау көбейетін болды – ҚР АШМ

ERNUR.KZ. Алдағы жылдан бастап қант қызылшасын субсидиялаудың көлемі артпақ. Биыл фермерлер 280 мың тоннадан астам өнім тапсырды. Көктемде 11,7 мың гектар жерге қант қызылшасы егілді, деп жазады azattyq-ruhy.kz.

Республикада қызылша өсіретін негізгі өңірлер – Алматы, Жетісу және Жамбыл облыстары. Осы өңірлерде қант қызылшасын өңдейтін негізгі өндірістік кәсіпорындар орналасқан. Отандық қызылша өсірушілер биыл өңдеуге 281 мың тонна шикізат тапсырды.

Бүгінгі күні мемлекет осы күрделі дақылды өсіруге жұмсалатын шығындарды ішінара субсидиялайды, сондай-ақ зауыттарға тапсырылған өнімді субсидиялайды.

«2021 жылы өңірлердегі қызылша өсірушілер шамамен 3 млрд теңге алды. 2022 жылы субсидиялау нормативі 3 мың теңгеге ұлғайып, өңдеуге тапсырылған қант қызылшасының тоннасы үшін 15 мың теңгені құрады. Зауыттар шикізатты тоннасына 15 мың теңгеден сатып алады. Түптеп келгенде шаруалардың өніміне 30 мың теңге төленеді.
2023 жылдан бастап субсидиялау нормативі 15 мың теңгеден 25 мың теңгеге дейін ұлғайтылады, соның арқасында қызылша өсірушілер өз өнімінің әр тоннасын 40 мың теңгеге сататын болады. Осылайша, қант қызылшасының рентабельділігі басқа дақылдардың деңгейінде жеткізіледі»,- деді Ауыл шаруашылығы министрлігінің баспасөз қызметі.

Бұдан бөлек, қант саласын дамытуды ынталандыру аясында инвестициялық субсидиялау тізбесіне жаңа қант зауыттарының құрылысы енгізілмек, капитал салымдарының 25%-ын мемлекет өтейді.

Қызылша жинайтын комбайндар мен суару техникаларын сатып алуға өтемақы нормативін 25%-дан 50%-ға дейін ұлғайту мәселесі пысықталып жатыр. Субсидиялаудың жаңа ережелері 2023 жылдан бастап күшіне енеді деп күтіліп отыр.

Айта кетейік, 2026 жылға дейін қант саласын дамыту жөніндегі кешенді жоспарды іске асыру аясында егістік алқаптарын 38 мың гектарға дейін ұлғайту жоспарланған.