Магистратураға түсуге арналған кешенді тестілеудің қорытындысы шықты

10.08.2024 14:29

896

Тестілеу қорытындысы бойынша 149 қатысушының нәтижесі жойылды.

ERNUR.KZ. Магистратураға түсуге арналған кешенді тестілеуді 39 мыңнан астам адам тапсырды, деп жазады sputnik.kz.

Олардың 43%-ы шекті балл жинады, деп хабарлады Ғылым және жоғары білім министрлігі.

Орташа көрсеткіш – 75 балл. Ең жоғары балл – 132.

"Тестілеу қорытындысы бойынша 149 қатысушының нәтижесі жойылды. Оның ішінде 101 оқуға түсуші смартфон, шпаргалка және басқа да тыйым салынған заттарды алып өтуге тырысқаны үшін тест тапсыру мүмкіндігінен айырылды", - деп жазылған хабарламада.

Ал кешенді тестілеу кезінде ережені бұзғаны үшін аудиториядан 41 адам шығарылып, олардың нәтижелері жойылды.

Кешенді тестілеуге кіргізудің үш деңгейлі жүйесінің арқасында 3 бөгде тұлға анықталды. Сондай-ақ тестілеу бейнежазбаларын қайта тексеру нәтижесінде 4 адамның балы жойылды.

Айта кетері, ереже бұзушылық өткен жылмен салыстырғанда (2023 жылы – 281) шамамен екі есеге азайды.

Ғылыми-педагогикалық бағыт бойынша магистратураға түсу үшін кемінде 75 балл, бейіндік бағыт бойынша кемінде 30 балл жинау қажет. Магистратурада оқуға 13 мың грант бөлінді.