Маусым айында жұмыс берушілер Электрондық еңбек биржасында 94 мыңнан астам бос жұмыс орнын орналастырды

Бос жұмыс орындарының жалпы өсуіне қарамастан, фермерлерге, ауыл шаруашылығы, өнеркәсіп, құрылыс және көлік жұмысшыларына сұраныстың төмендеуі байқалды. Ұсыныс берушілер тарапынан ауыл шаруашылығы жұмысшылары мен өндірістік сектор операторларының түйіндемелері санының төмендеуі байқалды. Бұл ретте біліктілік бойынша сұраныс құрылымы өзгеріссіз қалды – орта білікті жұмысшылар ең жоғары сұранысқа ие болды (32,8 мың бос жұмыс орны немесе 37%).

Маусым айында білім беру (18,4 мың бос жұмыс орны), басқа да қызмет түрлері (16,4 мың бос жұмыс орны), денсаулық сақтау (8,9 мың бос жұмыс орны) және құрылыс (8,5 мың бос жұмыс орны) салаларының ұйымдары еңбек нарығында дәстүрлі түрде жоғары белсенділік танытты. Олардың үлесі орналастырылған барлық жұмыс орындарының жартысынан көбін құрады.

Өңірлік бөліністе Атырау (7 мың) және Жамбыл (6,7 мың бос жұмыс орны) облыстарының, сондай-ақ Астана (6,7 мың) және Алматы (6,2 мың бос жұмыс орны) қалаларының жұмыс берушілері белсенділік танытты. Бұл ретте, өткен аймен салыстырғанда Алматы және Атырау облыстарында бос орындар саны екі есе өскен, ал Астана қаласы мен Батыс Қазақстан облысында сұраныс керісінше төмендеді (тиісінше 13% және 16% - ға).

Түйіндеме санының артуы тек екі өңірде – Шымкент қаласында (+240 түйіндеме) және Атырау облысында (+58 түйіндеме) байқалды. Жұмыс іздеушілердің белсенділігі Батыс Қазақстан (-30% немесе 1,6 мың түйіндеме), Түркістан (-20% немесе 2,4 мың түйіндеме) және Солтүстік Қазақстан (-19% немесе 450 бос жұмыс орны) облыстарында азайды.

Маусым айында білікті қызметкерлер арасында ең танымал мамандықтар автокөлік жүргізушілері (1,7 мың бос жұмыс орны), медбикелер (1,6 мың бос жұмыс орны) және тәрбиешілер (1,5 мың бос жұмыс орны) болды. Бұл ретте PR-менеджерлерге (+1,2 мың бос жұмыс орны), іс жүргізушілерге (+948 бос жұмыс орны) және автоматтандыру инженерлеріне (+235 бос жұмыс орны) сұраныс артты.

Маусым айында жұмыс берушілер ең көп жалақыны бас құрылысшыларға (орта есеппен 662 мың теңгеден бастап), үңгілеушілерге (~612 мың теңге), сондай-ақ IT-қосымшаларды әзірлеушілерге (~563 мың теңге) ұсынды.

Жұмыс іздеушілер тарапынан басшылық лауазымдарға үміткерлерді қоспағанда, ең жоғары жалақыны өз түйіндемелерінде ұшқыштар (орта есеппен 1 млн теңгеден бастап), кеме капитандары (~933 мың теңге) және коммерциялық кәсіпорындардың құрылымдық бөлімшелерінің басшылары (~920 мың теңге) көрсетті.