Ресейдегі Wildberries қоймасындағы өрттен қазақстандықтар шығынға ұшырады ма – Министр жауап берді

16.01.2024 14:57

664

13 қаңтарда Санкт-Петербургтегі Wildberries қоймасынан өрт шыққан болатын.

ERNUR.KZ. Сауда және интеграция министрі Арман Шаққалиев Ресейдегі Wildberries қоймасынан шыққан өртке қатысты түсініктеме берді. Министр өрт кезінде келтірілген шығын туралы қазақстандықтардан шағым түспегенін мәлімдеді, деп жазады stan.kz.

Министр өртенген қойма Wildberries сақтау сыйымдылығының шамамен 3,5 пайызын құрайтынын түсіндірді. Жалпы алғанда, компанияның Ресейде 100-ден астам пункті бар. Сондықтан министр бұл жағдай қазақстандық кәсіпкерлерге әсер етпегенін айтты.

"Бүгінде бізде қанша тауардың бүлінгені туралы нақты ақпарат жоқ. Себебі бұл жерде тергеу, санау, тексеру жұмыстары жүріп жатыр. Жеткізу мүмкіндіктеріне келетін болсақ, көлік паркі зақымданбаған. Біздің тауарларды сақтау және өңдеу пункттерінің кейбірі Ресейдің орталық бөлігінде орналасқан, процесс қалыпты түрде жүріп жатыр. Әзірге бізге ешқандай өтініш түскен жоқ. Тергеу нәтижесін күтуіміз керек”, - деді министр.

Еске салайық, 13 қаңтарда Санкт-Петербургтегі Wildberries қоймасынан өрт шыққан еді. 70 000 м² аумақтағы өрт локализацияланған. Жалын кезінде ғимаратта кем дегенде 1000 адам болған.